6,733 Бардыгы /

Бул макала “Окурмандан ой пикир” рубрикасына окурман тарабынан жазылган. Аймак редакциясынын көз карашын билдирбейт. Урматтуу окурмандар Сиз да коомдо болуп жаткан окуялар тууралуу ар кандай ой-пикирлериңизди жазып калтырсаңыздар болот.

Эртең 23-сентябрь кыргыз тили мамлекеттик  тил макамын алганына 28 жыл толот. 28 жылдан бери  бул күн салтанаттуу майрамдалып келет. Бүгүн Жалал-Абадда шаардык деңгээлде тил майрамы өткөрүлүп жатат деп угуп, бардым. Иш чара алгач жарманке менен башталды. “Ариет” балдар чыгармачылык борборунун кол өнөрчүлүгү коюлуптур. Жасагандары кыргызча ою-чийүүсү тимеле укмуш бирок жан кейитип, орус тилинде “папа-мама” деп сайма сайып койгонун көрүп, ичимден оор үшкүрдүм. Жаштарыбыздын “чала кыргыздыгы” кол өнөрчүлүгүбүзгө да жеткен экен. Шаардагы беш аймактык башкаруу тамак-аштан жарышыптыр. Аш, Беш бармактан тарта, козу гриллге чейин коюшуптур. Азаматтар. А бирок “Спутник” аймактык башкаруусу тоготпогонбу беш алты нан менен алма, жүзүм мөмөлөрүн гана эптеп алып чыгыптыр. Башкалардын жетекчилери кошо бапырап чуркап жүрүшсө булардан түзүк бир өкүл да көрүнбөдү. Жап жаш эки кызды кароол кылып коюптур. Андан соң, Барпы театрында концерттик иш чара болду. Эң жакшы башталды десем болот. Кыргыз тили гимни жаңырып, баары ордунан туруп, колун жүрөгүнө коюп ырдашты. Шаардын жүзүн “Ариеттин” жаш таланттары жабат бейм, жалаң эле алар ырдап бийлеп жатышты. Жалал-Абадда ырчы-чоорчулар абдан көп эле. Аттиң бирөөсү да келбептир. Ким билет балким шайлоолоп кетишкендир. Облус жетекчи, шаар башчылардын өздөрү тургай жардамчы, орун басар, жок дегенде алар менен кай жакка барса эрчип алчу мекеме жетекчилеринин  карааны да көрүнбөйт. Көрүүчүлөрдүн баары жаштар, студенттер. Алар да студенттигин кылышты. Кимдир бирөө бар деп айласыз жөнөткөндүгүн билдирип коюшту. Майрам сайын ардак грамоталар аябай берилип, алган кызматкерлер чыкыйып келишет да, колуна сыйлык тиер менен артын карабай жөнөчү эле. Концерт иш чарага киргенден кийин сый үчүн да, этика үчүн акырына чейин отуруу маданияты алда качан унутулган го. Анын сыңары бул майрамда сыйлыгын колуна алып жөнөгөндөр менен көрүүчүлөр кошо жөнөп калышты. Зал бир оодарылып алды окшойт. Байкуш сахнага жаңы эле көркөм окууга чыккан кыз, бир аз оңтойсуз абалда токтоп калды. Театрдын кызматкери эшикти жаап студенттерди чыгарбай койду. Ошентип кете албай кайра отуруп баштаганда көркөм ыр окулуп баштады.  Шаардык деңгээлдеги кыргыз тили майрамы жетекчилерсиз, эл сыйлаган маданият кызматкерлерисиз өттү. “Айт сени шайлоо” – деп аны күнөөлөп койдум. Эл дүрбөсө эшек кошо дүрбөйт болуп жүрүшөт окшойт.

Элдик сынчы