9,128 Бардыгы /

Бүгүн 20-март күнү Жалал-Абад шаарынын Барпы театрында Жалал-Абад периси аныкталды.

“2018-жыл Аймактарды өнүктүрүү жылына” карата Барпы театры тарабынан “Жалал-Абад периси-2018″ аталышындагы кароо сынак болуп өттү.

” Конкурска жалпы 10 кыз катышты. Катышуучулар негизинен жогорку, орто окуу жайлардын студенттери жана мектеп окуучулары болду. Бүгүн өткөн сынак Жалал-Абад шаардык деңгээлде өттү. Жеңүүчү аталган кыз финалга чыгат жана күзүндө болуучу областтык деңгээлдеги сулуулар сынагына катышат”- дейт Барпы театрынын администратору Белек Алакулов.

Конкурска Жалал-Абад шаарынын ай чырайлуу, кымча белдүү сулуулары катышып, 10 конкурсант аталган иш чарада өз өнөрлөрү менен таймашышты.

Конкурстун шарттары:

1. Саламдашуу (видеоролик);

2. Улуттук кийим менен подиум;
3. Өз өнөрүн тартуулоо;
4. Салат жасоо;
5. Кечки азем;
6. Суроо-жооп.

Аталган шарттарды мыкты аткарып, атаандаштарынан өзгөчөлөнгөндүгү үчүн калыстар тобу Жасмина Турсуналиеваны Жалал-Абад периси деп табышты.

“Бул конкурска 28-февралдан бери даярданып келдим. Мага кыйынчылык деле болбоду. Анткени мен өз күчүмө ишенип бул конкурска катыштым жана жеңишиме да ишенгем.  Өзүм 21-мектептин 11-классынын окуучусумун.  Мындан кийин областтык деңгээлдеги сулуулар сынагына катышам жана жеңүүгө аракет кылам. Мектеп окуучусу болгонума карабай бул сыяктуу конкурстарга көп катышат болчум. Бүгүнкү жеңишим келечегиме мотивация берди деп айта алам” – дейт жеңүүчү Жасмина Турсуналиева.

Бүбүсара  Орозалиева, «Аймак»