5,823 Бардыгы /

  Кыргызстан орто жана жогорку окуу жайлардын саны жагынан Дүйнөдө эң алдыңкы орундардын бирин ээледи. Бирок, бул аркылуу билим сапаты жакшырып, анан дагы турмуш-шартыбыз дегеле оңолуп кеткен жок! Ушул жана башка суроолордун тегерегинде Ош курулуш коллежинин доценти, техника илимдеринин кандидаты, доцент Сагынбай АКМАТОВ менен чогуу-чараан баш ооруттук.

– Сагынбай агай, Сиз деле байкагандырсыз, соңку кезде Кыргызстандын Түштүк башкалаасында курулуш дээрлик көбөйүп баратат. А бирок, дегеле бурулуш жок!

– Ооба. Чаржайыт чоң-кичине курулуштар күн сайын арбып гана баратат. Бирок, менимче, Ош шаарынын Башкы Планы бул ирет көңүл сыртында эле калып жаткандай…

–  Сиздин баамыңызда, бул көйгөйдүн негизги себеби эмнеге барып такалат?

– Ар кандай чоң-кичине курулуш өтө олутуу үч баскычтан турат. Биринчиси: абдан сапаттуу долбоор. Экинчиси: курулуштун өзү. А үчүнчүсү: обьектинин пайдаланууга толук кандуу бүткөрүлүп тапшырылышы.

– А бизде андай эмес экендигин Сиз деги аңдабадыңызбы?

– Алишер, кокус долбоордо орой катачылык билинсе, анын авторлору жана дагы курулушту аткаруучулар керт башы менен катаал жазага тартылышат. Анткени, мындай жоопкерчилик бардык Кыргыз мыйзамдарында абдан катуу каралган.

– Сагынбай агай, Сиз Ош курулуш коллежинде көп жылдар бою эмгектенген дасыккан адиссиз. Ар университет жана институт астында IT технология, курулуш адистиктерин чаржайыт даярдабастан, ушуларды бүт бир эле билим берүү мекемесинде, маселен, Түштүк жергеси боюнча жалгыз Сиздердин коллежде эле белендешсе болбойт беле?

– Маселени кабыргасынан койгонуң жөндүү. Мен деле дайыма дал ушундай гана позицияны тутунуп келатам. Маселен, Бишкек шаарында Техникалык университет гана кеңири профилдеги курулуш тармагындагы адистерди даярдайт жана мындан булар утуп гана келатышат.

Ош шаарында деле ОшТУдагы жана дагы башка ЖОЖдордогу курулуш адистерин даярдаган бөлүмдөрдү, факультеттерди бүт Ош курулуш коллежине кошуп, анан дагы бул окуу жайдын макамын ого бетер жогорулатып Ош курулуш институтуна айландыруу – бүгүнкү мезгилдин талабы. Балким, менин ушундай жүйөөлүү сунушум үчүн кесиптештерим мени төө бастыга алышаар. Анткени менен турмуш чындыгын мен дал азыр айтып коюуга тийишмин! Кийин кеч болот…

Кепке тарткан: Алишер ТОКСОНБАЕВ, өз кабарчы