Залкарбек КАРИМОВ: “ӨЗГӨН ШААРЫН КЕҢЕЙТҮҮГӨ ЖЕР ТАРТЫШ!”

918 Бардыгы /

Залкарбек КАРИМОВ акыркы жылдарда Ош облусунун Алай районундагы Будалык жана Коңур-Дөбө айыл өкмөттөрүн ийгиликтүү жетектеген. Ал эми соңку тапта Өзгөн райондук мамлекеттик акимчилигинде экономика, өндүрүш жана айыл чарба бөлүмүн башкарып жаткан. 40 жаштагы жигитти Өзгөн районунун акими Каныбек АПБАСОВ Өзгөн шаарынын мэрлигине дайындап олтурат. Маегибизди дал ушундан баштадык.

– Залкарбек мырза, Сиз Каныбек АПБАСОВ Алай районунун акими чагында ушул эле райондун Будалык жана Коңур-Дөбө айыл өкмөттөрүн башкаргансыз. А азыр Каныбек АПБАСОВ – Өзгөн районунун акими. Эмне, Сиздин жаңы кызматка дайындалууңузда коррупциянын жана дагы тааныш-билишчиликтин жыты жокпу?

– Жо-жок! Мен Каныбек АПБАСОВ Өзгөн районунун акими болуп дайындалганга чейин эле Өзгөн райондук мамлекеттик акимчилигинде экономика, өндүрүш жана айыл чарба бөлүмүн башкарып келаткамын. Ал эми Каныбек Апбасов мени тээ мурунтан жакшы билгендиктен, көптөн бери бош турган Өзгөн шаарынын мэрлигине зор ишеним көрсөтүп, мени акыры чогуу-чараан иштешүүгө чакырды. Албетте, кабыргам менен кеңешип-таңаштым. Бирок, баш тартпадым. Бул сапар мен деле билимимди жана дагы жөндөмүмдү сынап көрүүнү чечтим.

– Өзгөн шаары биргезде Караханид каганатынын башкалаасы эле. Ал эми азыр райондун гана борборуна араң айланды. Муну эми Борбор Азиядагы ири калаага айландыра алаар бекенсиз?

– Албетте! Мен ушуну үчүн бардык күч-кубатымды жана дагы билим-жигеримди сөзсүз жумшаймын! Анткени, калаабызды туристтердин аягы үзүлбөгөн жайга айландыруу мүмкүнчүлүгүбүз абдан жогору. Себеби мобул Мунара, ошондой эле Сарахсий күмбөзү (мавзолейи) эле эмнени туюндурат? Буюрса, Түркиядан колдоо таптык. 1,5 гектарды ээлеген аянтты заман талабына жараша толук бойдон реконструкциялайбыз.

– Өзгөндүктөр таза суудан кыйналышчуу эле?

– ЕврАзия өнүктүрүү жана реконструкциялоо банкынын жардамы аркасында байыркы каналазициябызды заман талабына ылайыкташтырып, биротоло жаңылайбыз. Ошондо таза суу маселеси дагы бир жаңсыл чечилет.

– – Залкарбек мырза, Президент Садыр Жапаровдун соңку Жарлыгына ылайык Ош жана Кара-Суу шаарларына коңшулаш айыл өкмөттөрү кошулуп кыйла кеңейтилди. Сиздерди деле ушинтсе болбойт беле?

– Абдан туура баамдапсыз. Өзгөн районундагы Баш-Дөбө жана Дөң-Булак айыл өкмөттөрү Өзгөн калаасына ирегелеш гана жайланышкан. Эгерде булар кудай жалгап шаарыбызга кошулса, биз деле ого бетер кеңеймекпиз. Анан заман талабына жараша көп кабаттуу үйлөр дагы курулмак. Ошондо бир катар социалдык көйгөйлөрдөн (турак жай, бала бакча, мектеп, мечит) биз деле опоңой кутулмакпыз!