1,167 Бардыгы /

          Жогорку Кеңештин басма сөз кызматынан билдиришкендей, Кыргыз парламентинин төрагасы Нурланбек Шакиев Кыргыз Улуттук Илимдер Академиясына атайын баш багып, анын эмгек жамааты менен кеңири форматта жолугушту.

          – Биздин билишибизче, Кыргыз Улуттук Илимдер Академиясы ушул тапта нукура реформага абдан муктаж! – деп кашкайган чындыкты моюндады Жогорку Кеңеш төрагасы Нурланбек Шакиев. – Анын функионалдык мүмкүнчүлүктөрүн ар тараптуу караштырышыбыз кажет. Анткени, бул мекеме илимий изилдөөлөрдүн чыныгы борборуна гана айланып, мезгилдин бардык талабына толук кандуу жооп берүүгө тийиш! Эгерде биз дал азыр илимге жетиштүү көңүл бөлбөсөк, анда башка тармактардын дагы өнүгүшүнө заманбап шарт жарата албайбыз. Себеби, биздин экономикабыздын алга жылбай жаткандыгы, анын илимге негизделбегендигинде гана болуп жатат.

          Сөз арасында спикер Нурланбек Шакиев Кыргыз Улуттук Илимдер Академиясын реформалоо үчүн жаңыдан түптөлгөн министрликтин профилин дагы өзгөртүүгө тийиш экендигин кошумчалады.

          – Билим берүү жана илим министрлиги бир эле мезгилде бала-бакчаларга, мектептерге, кесиптик лицейлеге жана дагы жогорку окуу жайларына, ошондой эле Кыргыз Улуттук Илимдер Академиясына жана дагы башка билим берүү жана изилдөө мекемелерине көз салат. Тилекке каршы, аталган мекеме ушулардын бардыгын тиешелүү даражада камсыз эткенге үлгүрбөй деле жатат. Анан дагы аларды ири реформалоо дагы дегеле мүмкүн эмес! – деп кошумчалады Жогорку Кеңештин спикери Нурланбек Шакиев. – Ошондуктан, бул өңүттө эки министрлик уюштуруп, булардын бири мектепке чейинки жана мектептеги, ал эми экинчиси ЖОЖдордогу жана илимий институттардагы иштерди гана ырааттуу түрдө жүргүзүүсү кажет!

          Жолугушуу соңунда Жогорку Кеңеш төрагасы Нурланбек Шакиев Кыргыз Улуттук Илимдер Академиясынын кызматкерлеринин маянасынын аздыгы туурасындагы даттануусуна дагы дароо жооп кайтарып жатып, бул жолугушууда айтылган бардык көйгөйлөрдү кенен-чонон жана терең анализдеп чыгууга, андан ары илимпоздордун эмгек акысын мындан ары көбөйтүүгө өзгөчө көңүл бураарын абдан катуу убадалады.

          Алишер  ТОКСОНБАЕВ, өз кабарчы