Рустам ТИЛЕНБАЙ уулу: “ПАПАН СУУ САКТАГЫЧЫНДА СУУНУН КӨЛӨМҮ БЫЙЫЛ ДЭЭРЛИК ҮЧ ЭСЕ КӨП!”

465 Бардыгы /

Ордолуу Ош жергесинде жайкы сезон дагыле табында. Демек, сугат жараяны аймакта абдан кызыган мезгили. Ушундай чакта Кара-Суу районундагы Султан Ибраимов атындагы Папан суу сактагычынын кызматкерлери күнү-түнү калк кызматында гана турушат. Муну аталган суу сактагычтын директору Рустам ТИЛЕНБАЙ уулу деле кабарчыбызга курган маегинде танган жок!

-Рустам мырза, чындыгында, Сиздердин ишиңиздер эми гана кычабадыбы. Деги канча киши калкыбызга кыйшаюусуз кызмат көрсөтүп келатасыздар?

-Ушул тапта Ош облусундагы эң ири Султан Ибраимов атындагы Папан суу сактагычында 70-80 адам күнү тыным, а түнү уйку көрбөстөн тынымсыз иштеп жатабыз. Эгерде Папанга ГЭС курулуп бүтсө, анда дагы 60 чакты кишини туруктуу жумуш менен камсыз этмекчибиз.

-Сиздер дагыле көрүнүктүү мамлекеттик ишмер Султан Ибраимовдун ысымын алып жүрөт турбайсыздарбы?

-Ооба! Фергана өрөөнүндөгү эң ири Папан суу сактагычын тээ Совет доорунда ошогездеги партиянын Ош обкомунун биринчи катчысы Султан Ибраимов демилгелеп, курдурткан. Мындан тышкары атактуу Токтогул ГЭСин тикелегенге дагы жол баштаган ушул инсан! Ошол себептүү залкар мекендешибиздин ысымын түбөлүккө калтыруу максатында ушундай чечимге келгенбиз.

-Суу быйыл Сиздердин суу сактагычта аз эмеспи?

-Жо-жок! Жыл сайын 80 миллион метр куб гана суу топтоочу элек. Ал эми быйыл күн ыраса жаагандыктан, өлчөмдөгү көлөмдү 220 миллион метр кубка, мындайча айтканда, дээрлик үч эсе көбөйткөнгө дагы үлгүрдүк.

-Рустам мырза, Сиз дегеле Папан жергесинин келечегин кандайча элестететсиз?

-Көрбөдүңүздөрбү? Көз тийбесин! Суубуз абдан кеңири. А былтыр кашайып айлабыз таптакыр куруган. Ошондуктан, беш күн бою суу топтоп, анан гана туруктуу кардарларыбызга – фермерлерге жана дыйкандарга беш күндөп суу агызчу элек. Кризистен дал ушинтип бошонуп, баардык тоскоолдуктарды акыры жеңгенбиз.

Мүмкүнчүлүктөн пайдаланып, мен дал азыр айтып коюум парз! Султан Ибраимов Папан өрөөнүнүн болочогун жүздөгөн жылдар мурун эле ойлоп койгон турбайбы. Буюрса, Папан жергеси бара-бара суу сактагычтын гана эмес, ири ГЭСтердин дагы Мекенине айланабыз!