2,256 Бардыгы /

Бир кезде алган жогорку билимин заман талабына жараша ылайыктыштырган мекендештерибиз, чынында, сейрек. Бул жолку маектешибиз Хосилжан АКБАРОВдун билими жогорку. Казакстандын Караганды шаарындагы кооператив институтутун бүтүргѳн. Ушул тапта Ноокат шаарында ити чѳп жеген ишкерлердин сап башында баратат.

–         Хосилжан мырза, жогорку билимиңиз бар туруп соода жана тейлѳѳ тармагына неге бекем ыктадыңыз?

–         Мен бул тармакты тандаганыма эмдигиче ѳкүнбѳймүн! Кѳрсѳ, мезгилдин талабын жана рыноктун тилин эртерээк аңдапмын. Моминтип  Ноокат шаарында “Кыргызстан” кафесин үзгүлтүксүз иштетип жатам. Мындан тышкары Орусияда дагы эки чакан дүкѳнүм бар. Экѳѳ тең калкка туруктуу кызмат кѳрсѳтүп келе жатат.

–         Ноокат шаарынын бюджетине кошкон салымыңыз деле чоң эле ѳңдѳнѳт?

–         Калаабыздагы ири салык тѳлѳѳчүлѳрдүн биримин десем такыр жаңылышпаймын. Ай сайын Ноокат шаарынын казынасына 40-50 миң сом тѳгүп турабыз. Мындан тышкары кафебизде баш-аягы 40-50 чакты адам дагы эмгектенет. Булардын эле орточо маянасы он-он беш миң сомдун тегерегинде. Анан калса айлыктары дагы убагында гана колдоруна тийип турат.

–         Президент Сооронбай Жээнбеков бей-жай текшерүүлѳрдү биротоло тыйганына кубанып тургандырсыздар?

–         Албетте! Кѳрдүңүз го, сүйүнүчүбүз алигүнчѳ таркай элек. Ооба, Президентибиз Сооронбай Жээнбеков ѳз маалында абдан чечкиндүү кадам жасады. Ыксыз текшерүүлѳргѳ эки жылга тыюу салды. Дал ушунун ѳзү Кыргызстанда орто жана чакан бизнестин ырааттуу түрдѳ ѳнүгүшүнѳ гана ѳбѳлгѳ жаратып олтурат. Мындан тышкары ѳлкѳбүздүн бюджетине дагы жетиштүү кѳлѳмдѳ акча түшүп жатат.

–         Хосилжан мырза, ѳзүңүз биргезде Чернобыль АЭСнин кырсыктарын четтетүүгѳ активдүү катышкан турбайсызбы. Демек, калктын аяр катмарына үзгүлтүксүз каралашып жатканыңыз дагы бекеринен эместей?

–         Ооба. Чернобыль АЭСиндеги каргаша эзели адам баласынын башына дагы түшпѳсүн! Мен аны ѳз кѳзүм менен кѳрбѳдүмбү. Ошондуктан, биз Кыргызстанда моминтип кайрымдуулук жараяндарын тынбай ѳткѳргѳндү кадимки адатка айландырдык.

Маселен, Ноокат шаарында жашап жатышкан майып жана жетим балдар “Кыргызстан” кафесинен жыл бою бекер гана тамак ичишет. Мындан тышкары майрам күндѳрдѳ, же атайын иш-чараларда калкыбыздын эң аялуу катмарына байма-бай кѳңүл буруп каралашып, алардан жылуу-жумшак мамилебизди эч аябайбыз! Анткени, баарыбыздын Мекенибиз бир, ал -Кыргызстан!

Алишер ТОКСОНБАЕВ, өз кабарчы