1,200 Бардыгы /

Казакстанда бир нече саатын аралыгында Улуттук гвардиянын эки кызматкери асынып алган абалда табылды. Бул тууралуу жергиликтүү басылмалар кабарлашты.

Маалыматка караганда, алгач Акмоло облусунун Степногорск шаарындагы аскер бөлүгүндө 1995-жылы төрөлгөн жоокердин сөөгү табылган.

“29-июлда кечки саат тогуздарда автопаркта нөөмөтчүгө жардамчы болуп турган катардагы жоокер Уразбай Н.А. ажаатканага суранып кеткен. Бир нече убакыттан кийин ал автопарктын кампасында асынып турган абалда табылган”, – деп жазылган Улуттук гвардиянын билдирүүсүндө.

Уразбай Улуттук гвардияда 2021-жылдын күз айларынан бери кызмат өтөп келген.

Бир нече сааттан кийин Маңгыстау облусунун Мунайлы районундагы Баскудук айылында Улуттук гвардиянын сержанты өз үйүндө асынып алган жеринен табылган.

“30-июлда таңкы саат 5.15терде аскер бөлүгүнө сержант Абылай Мергалиев асынып алганы тууралуу кабар келип түшкөн. Териштирүүнүн жүрүшүндө түнкү 3:30дарда жубайы күйөөсүн үйдүн ажаатканасында асынып турган абалда тапканы белгилүү болду”, – деп билдиришти Улуттук гвардиядан.

Атайын комендатуранын күзөт башчысы, 1990-жылы төрөлгөн Абылай Мергалиев Улуттук гвардияда 2015-жылдан бери кызмат өтөп келген. Анын артында жубайы жана кызы калды.

Көп өтпөй Акмоло облусунун Щучинск шаарындагы Аскердик колледждин түнкү нөөмөттөгү кадети жаракат алганы кабарланды. Бул маалыматты өлкөнүн Коргоо министрлиги ырастап, тергөө иштери башталганын билдирди.

Акыркы айларда Казакстандын аскер бөлүктөрүндө бир нече жоокер каза болду. Апрелде милдеттүү аскердик милдетин өтөп жаткан 18 жаштагы Алибек Калбай Жамбыл облусундагы аскердик госпиталда көз жумган. Анда Коргоо министрлиги жоокер “эртең мененки тизилүү учурунда эс-учун жоготконун”, ага жардам көрсөтүлгөнү менен өмүрүн сактап калууга мүмкүн болбогонун билдирген.

Июнь айында Чек ара кызматынын Маңгыстау облусундагы аскер бөлүгүндө 19 жаштагы Едиль Тешебаев каза тапкан. Анда ал асынып алганы кабарланган. Бирок жоокердин жакындары ал өз өмүрүнө кол салганына ишенбей тургандыктарын айтышкан.

WWW.