2,655 Бардыгы /

          ОШ. Кыргызстандын мамлекеттик Чек ара кызматы Кыргыз-Өзбек чек арасындагы «Достук» өткөрүү бекетиндеги учурдагы акыбал туурасында маалымат таратып, мамлекеттик мекеменин мүлкүнө олуттуу зыян келтиргендер акыры мыйзам чегинде жоопко тартылаарын дагы абдан катуу эскертти.

Маалыматта баса айтылгандай, Кыргыз-өзбек чек арасындагы «Достук» өткөрүү бекети ушул тапта кадимки эле тартипте иштеп жатат. Бирок, реконструкциялоо иштери жүргүзүлүп, жүргүнчүлөр үчүн ыңгайлуу шарттар түзүлгөндүгүнө карабастан, жүргүнчүлөр жаңы имаратка залака келтирилген учурлар дагыле катталууда. Кыргызстандын мамлекеттик Чек ара кызматы кошумчалагандай, адамдар жаңы заманбап имараттагы мүлккө аяр мамиле жасабастан, айнектерди сындырып, а түгүл эшиктерди дагы талкалап, машинасы менен тосмолорду сүздүрүп кеткен фактылар үстөккө-босток катталууда. Аталган мекемеден билдиришкендей, ушул тапта «Достук» бекетинде оңдоп-түзөө жана жаңылоо жараяны активдүү жүргүзүлгөндөн тартып ары-бери каттаган адамдардын саны ого бетер арбыды. Мурун бул Чек ара бекети аркылуу күн сайын 14,5 миң адам өтсө, а азыр булардын саны 22 миңди чапчып олтурат.

Баса, коңшулаш эки өлкөнүн – Кыргызстандын жана Өзбекстандын чек арасында жалпысынан 15 өткөрүү бекети бар. «Достук» чек ара бекети Ош облусунун Кара-Суу районунда жайланышкан. Бал аркылуу эки өлкөнүн жарандары ары-бери үзгүлтүксүз каттап турушат. Өзбекстандыктар Кыргызстандын аймагы аркылуу башка мамлекеттерге дагы андан ары кетишет. А айрымдары бул жакта ар кандай жумуштарда аркалашат.

Өзбекстан 2010-жылдагы Кыргызстанда жүз берген саясий окуялар учурунда бардык чек ара бекеттерин тегиз жаап таштаган. Мындай чектөөлөр 2017-жылдын сентябрында гана алынып ташталган.

Алишер ТОКСОНБАЕВ, өз кабарчы