1,065 Бардыгы /

Тажикстандын Башкы прокуратурасы быйыл май айында Тоолуу Бадахшан автоном облусунда болгон окуялардан кийин 77 киши “татыктуу жазага тартылып”, дагы ондогон жергиликтүү тургундун иши сотто каралып жатканын билдирди.

7-октябрда мекеменин расмий сайтына жарыяланган билдирүүгө ылайык, жалпысынан Тоолуу Бадахшандагы башаламандыктардан кийин 109 кишиге кылмыш иши козголуп, алардын 77си сот өкүмү менен “татыктуу жаза” алса, дагы 32 айыпталуучунун иши сотто каралууда.

21-сентябрда Тажикстандын Жогорку соту отставкадагы генерал-майор Холбаш Холбашовду Тоолуу Бадахшан облусундагы кандуу нааразылыкты уюштуруу айыбы менен өмүр бою эркинен ажыраткан. Ага Кылмыш-жаза кодексинин “Кылмыштуу топ түзүү”, “Адам өлтүрүү”, “Адам өлтүрүүгө аракет кылуу”, “Терроризм” жана башка бир катар беренелери боюнча айып тагылган.

Тоолуу Бадахшандагы кырдаал былтыр ноябрда күч органдарынын атайын операциясында Рошткала айылынын тургуну Гүлбиддин Зиёбеков өлтүрүлгөндөн кийин курчуп кеткен.

16-майда автоном облустун борбору Хорог шаарында тургундар Зиёбековдун өлүмүнө күнөөлүүлөрдү жазалоону талап кылып митингге чыккан. Бийлик нааразылык акция “уюшкан кылмыштуу топ” тарабынан уюштурулганын билдирип, акцияны басуу үчүн борбордон кошумча күч жөнөткөн. Тажикстандын Ички иштер министрлиги (ИИМ) митингчилер аскерлерге кол салып, андан кийин күч органдары “антитеррордук операция” баштаганын кабарлаган.

Анын жыйынтыгында 40ка жакын адам набыт болуп, 200гө жакын киши камакка алынган. Эл аралык уюмдар жана Батыш өлкөлөрү тынчтык акцияларынын күч менен басылышына тынчсыздануусун билдирип, Тажикстандын бийлигин Тоолуу Бадахшандын тургундарынын укуктарын жана эркиндиктерин урматтоого чакырган.

WWW.