3 Бардыгы /

Түндүк–Түштүк альтернативдүү унаа жолу ноябрь айына чейин унаа кыймылы үчүн убактылуу ачылды. Бул тууралуу ЖКККББнын басма сөз кызматы билдирди.

Жол аркылуу транспорт каражаттары күн сайын саат 06:00дөн 20:00гө чейин каттай алышат. Бул чечим туристтик мезгилде негизги автожолдордогу транспорттук тыгындарды азайтуу жана жарандардын жүрүп-туруу шарттарын жакшыртуу максатында кабыл алынган.

Көк-Арт ашуусундагы тоннель аркылуу Жалал-Абад шаарынан Балыкчы шаарына жетүү убактысы болжол менен 13 сааттан 6 саатка чейин кыскарат.

Учурда жолдун айрым кооптуу тилкелеринде көпүрөлөрдүн, ошондой эле кар көчкүдөн коргоочу курулуш иштери улантылууда. Ушуга байланыштуу айдоочулардан жол белгилеринин талаптарын так сактап, белгиленген ылдамдык режиминен ашпоону жана өзгөчө этият болууну эскертет.

Белгиленген маалыматтарга ылайык, Түндүк–Түштүк альтернативдүү унаа жолунун курулушун толугу менен 2028-жылдын аягына чейин аяктоо пландалууда.