3 Бардыгы /

Кечээ, Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаевдин тапшырмасынын негизинде өкүлдүн орун басары Исламбек Увайдуллаев Манас шаарында курулуп жаткан “Акылман” президенттик лицейинин курулуш иштеринин жүрүшү менен таанышты.

Курулуш объектисине Манас шаарынын мэри Абдупата Маткаликов жана тиешелүү мекеме-ишканалардын жетекчилери да катышып, аткарылып жаткан жумуштар каралды.

Жалпы наркы 2 млрд 160 млн сомду түзгөн билим берүү мекемесинин курамына 360 орундуу, 3 кабаттуу жана 35 окуу классы бар окуу имараты, 196 орундуу ашкана, спорт зал, 25 метрлик бассейн, китепкана, 280 орундуу жыйын залы, 420 орундуу жатакана жана мугалимдер үчүн 25 батир кирет. Учурда курулуш иштеринин 65 пайызы аяктаган.

Объекттеги жумуштардын жүрүшү менен таанышкан Исламбек Увайдуллаев лицейди жаңы 2026–2027-окуу жылынын башталышына чейин толук бүткөрүү зарылдыгын белгилеп, курулуш иштеринин темпин ылдамдатууну тапшырды. Ошондой эле аткарылып жаткан жумуштардын сапатына өзгөчө көңүл буруп, бардык иштер белгиленген талаптарга ылайык жана жогорку сапатта жүргүзүлүшү керектигин белгиледи.