3 Бардыгы /

Кыргыз Республикасынын Энергетика министрлиги тарабынан энергетика тармагын туруктуу өнүктүрүү жана электр энергиясы менен камсыздоонун ишенимдүүлүгүн жогорулатуу боюнча ырааттуу иштер жүргүзүлүүдө. Министрлик бекиткен программалардын алкагында өлкөнүн аймактарында электр тармактары жаңыланып, жаңы энергетикалык объектилер пайдаланууга берилүүдө.

Жалал-Абад электр тармактар ишканасынын маалымат кызматы билдиргендей, аталган иштердин алкагында “Кыргызстан УЭТ” ААКнын филиалы Жалал-Абад электр тармактар ишканасында модернизациялоо жумуштары улантылат.

2026-жылы Манас шаарынын электр энергиясына болгон өсүп жаткан муктаждыгын камсыздоо максатында 110/10 кВ “Бакай” көмөк чордону курулат. Жаңы объект калкты, социалдык объектилерди жана курулуп жаткан көп кабаттуу турак жайларды туруктуу электр энергиясы менен камсыздоого шарт түзөт.

Ошондой эле  эскирген 3 энергетикалык объект жаңыланат:

– Кара-Көл РЭТинин имараты, Аксы РЭТине караштуу Кербен УЭТинин имараты жана Токтогул РЭТине караштуу Үч-Терек УЭТинин имараты.

Мындан тышкары, облус боюнча 5000 темир-бетон мамыча алмаштырылып, 270 чакырым аба чубалгысы заманбап СИП электр өткөргүчтөрүнө өткөрүлөт жана 50 даана жаңы трансформатор орнотулат.

Аткарылып жаткан иштер электр энергиясынын туруктуулугун камсыздоого жана калкка көрсөтүлүп жаткан кызматтын сапатын жогорулатууга жана энергетика тармагындагы ачык-айкындуулукту камсыздоого багытталат.