3 Бардыгы /

Кыргыз Республикасынын Энергетика министрлигинин электр энергиясы менен үзгүлтүксүз камсыздоо, электр тармактарынын ишенимдүүлүгүн жогорулатуу жана алдыдагы 2026-2027- жылдагы күз-кыш мезгилине сапаттуу даярдык көрүү боюнча тапшырмаларынын алкагында жогорку чыңалуудагы электр берүүчү аба чубалгыларында пландуу оңдоо жана жаңылоо иштери жүргүзүлүүдө.

Жалал-Абад электр тармактар ишканасынын маалымат кызматы билдиргендей, 2026-жылга карата жогорку чыңалуудагы электр берүүчү аба чубалгыларында жалпы 104 чакырым капиталдык оңдоо, 622 чакырым утурумдук оңдоо жана мамычаларга баруучу 75 чакырым жолду оңдоо иштери мерчемделген.

Бүгүнкү күнгө карата жүргүзүлгөн иштердин жыйынтыгында 45 чакырым аба чубалгысы капиталдык оңдоодон өткөрүлүп, 147 чакырым линияга утурумдук оңдоо иштери жүргүзүлдү. Ошондой эле электр берүүчү линиялардын мамычаларына баруучу 20 чакырым жол оңдолду.

Электр тармактарынын ишенимдүүлүгүн жогорулатуу максатында 2026-жылы жалпы 10 541 даана ПС-120Б жана ПС-70Е үлгүсүндөгү изоляторлорду алмаштыруу пландалган. Азыркы учурга чейин алардын 1 850 даанасы жаңыланып орнотулду.

Мындан тышкары, электр берүүчү линиялардын өткөрүү жөндөмдүүлүгүн жогорулатуу боюнча иштер да аткарылууда. Тактап айтканда, Базар-Коргон – Арсланбап 35 кВ аба чубалгысында 3,5 чакырым аралыктагы АС-70 маркасындагы өткөргүчтөр АС-95 маркасындагы өткөргүчтөргө алмаштырылды. Ал эми Торобаев – Сузак электр берүүчү линиясында 2,5 чакырым аралыктагы АС-70 маркасындагы өткөргүчтөр АС-150 маркасындагы өткөргүчтөргө жаңыртылды.

Жүргүзүлүп жаткан оңдоо жана жаңылоо иштеринин натыйжасында өткөн жылга салыштырмалуу техникалык жоготуулар болжолдуу түрдө 12 пайызга  азайган, ошону менен катар электр энергиясын жеткирүүнүн сапаты жакшырды.

Белгилей кетсек, жогоруда мерчемделген бардык оңдоо жана жаңылоо иштери бекитилген графикке ылайык 2026-жылдын ноябрь айына чейин толук аяктайт. Жасалган жумуштар авариялык өчүрүүлөрдүн алдын алууга жана керектөөчүлөрдү сапаттуу, туруктуу электр энергиясы менен камсыздоого багытталган.