3 Бардыгы /

1-июнь Балдарды коргоонун эл аралык күнүнө карата

Манас шаарында жайгашкан балдардын психоневрологиялык социалдык-стационардык мекемесинде уюштурулган майрамдык

иш-чарага калаа мэри Абдупата Маткаликов катышып, тарбиялануучулардын чыгармачылык өнөрлөрүнө күбө болду.

Манас шаардык мэриясынын маалымат борбору билдиргендей, майрамдык программада балдар ырдап, бийлеп, ошондой эле кол өнөрчүлүк эмгектерин келген конокторго тартуулашты.

Өз сөзүндө мэр ар бир бала мамлекеттин жана коомдун камкордугунда болуп, ар дайым коргоого тийиш экенин белгилеп, балдарды майрамы менен куттуктады. Ошондой эле мекеменин тарбиялануучуларына акчалай белек тапшырды.

Белгилей кетсек, учурда аталган мекемеде 156 бала тарбияланат.

Балдарды коргоонун эл аралык күнүнө карата Манас шаарынын жергиликтүү бюджетинен жалпы 830 миң сом каражат бөлүнгөн. Анын алкагында 18 жашка чейинки мүмкүнчүлүгү чектелген 1300 балага 500 сомдон, ал эми 40 тоголок жетим балага 1000 сомдон материалдык жардам көрсөтүлөт.

Мындан тышкары төмөнкү социалдык мекемелерге да финансылык колдоо көрсөтүлдү:

– Балдардын психоневрологиялык социалдык-стационардык мекемесине 30 миң сом;

– Р.Г. Бауэр атындагы облустук кургак учукка каршы күрөшүү борборунун балдар бөлүмүнө 20 миң сом;

– “Ак-Жол” балдар үчүн комплекстүү реабилитациялык борборуна – 50 миң сом;    -“Бакыт” реабилитациялык борборуна 30 миң сом;

–  Жалал-Абад облустук балдар ооруканасына 20 миң сом.

Ошондой эле аз камсыз болгон үй-бүлөлөрдүн 200 баласына майрамдык маанай тартуулоо максатында Т.Байзаков атындагы эс алуу багындагы “Данек” балдар оюн-зоок борборунда акысыз оюн кызматтары уюштурулуп, суусундуктар жана таттуулар таратылды.