3 Бардыгы /

Бүгүн, 1-июнь – Балдарды коргоо күнүнө карата Манас шаарындагы Барпы театрынын аянтчасында “Балдар – биздин келечек” аталышындагы иш – чара болуп өттү.

1-Июнь – Балдарды коргоо күнүнө арналган “Балдар – биздин келечек” аталышындагы иш-чара Манас шаардык мэриясы тарабынан уюштурулду.

Иш-чарада балдарга жакшы маанай тартуулоо үчүн кызыктуу оюн-зооктор, концерттик программалар, спорттук мелдештер уюштурулуп, жеңүүчүлөр Манас шаардык мэриясы тарабынан баалуу белектерди, сыйлыктарды алышты.

Бул тууралуу Манас шаардык социалдык өнүгүү бөлүмүнүн жетектөөчү адиси Бегимай Тойгонбаева төмөнкүлөргө токтолду.

“Бул жылы Манас шаарынын мэриясы тарабынан балдарды коргоо күнүнө карата өзгөчө көңүл бурулду. Бүгүнкү иш-чарага тогуз жүз миң сом акча каражаты бөлүнүп, социалдык колдоого муктаж болгон балдарга, мүмкүнчүлүгү чектелген балдарга материалдык жардам көрсөтүлдү. Ошондой эле башкармалыктын каттоосунда турган 1300 балага беш жүз сомдон акчалай көмөк көрсөтүлдү. Андан сырткары шаардагы аз камсыздалган 200 үй-бүлөгө “Данек” оюн-зоок борборуна жана Galaxy кино театрына бекер билеттер белеке берилди.  Ал эми бүгүнкү иш-чаранын демөөрчүлөрү болгон “Билайн” компаниясы тарабынан бекер суусундуктар, шириндиктер таратылды. Ошондой эле белгилей кетчү нерсе, концерттик программага  “Ариет” балдар чыгармачыл борборунун окуучулары катышышты”, – деди Б.Тойгонбаева.

Бүгүнкү майрам балдардын маанайын көтөрүп, кубаныч тартуулады.

Саадагүл Маматмуктар кызы, Манас шаарынын тургуну:

“Бүгүнкү балдарды коргоо күнүнө карата уюштурулган иш-чара аябай мыкты деңгээлде өтүп жатат. Эң негизгиси балдарыбыздын маанайы жакшы. Балдарды коргоо күнүнө ушунчалык көңүл буруп, концерт уюштуруп бергендиги үчүн мэрия кызматкерлерине ыраазыбыз”.

Азамат Токтосунов, сүрөт тартуу сынагынын жеңүүчүсү:

“Мен №19 мектептин  6-классынын окуучусумун. Бүгүн сүрөт тартуу сынагына катышып, биринчи орунга ээ болдум. Жеңүүчү болгонумду угуп, кубануу менен белек алдым”.

Мээрим Кубанычбекова, бийчи:

“Ариет” балдар чыгармачыл борборунун “Кыз бийке” бийчилер тобунун бийчисимин. Биз мындай иш-чараларга 5 жылдан бери катышып келебиз. Бүгүнкү иш- чарада уйгур бийин бийледик. Маанайыбыз эң мыкты деңгээлде, ушундай майрамдык кечелер ар дайым болуп турушун каалайт элек”.

Айсезим Тургуналиева, окуучу:

“Бүгүн мен мындай иш-чарага биринчи жолу катышып жатам. “Ариет” балдар чыгармачыл борборунда кол өнөрчүлүк боюнча 2 жылдан бери окуп, үйрөнүп жатам. Мага бүгүнкү иш-чаранын өзгөчө жаккан тарабы – балдардын ар бирине жакшы көңүл бурушуп, көптөгөн кызыктуу оюндарды уюштурушуптур”.