1,470 Бардыгы /

Европа биримдиги (ЕБ) Иранда адам укуктарынын бузулушуна күнөөсү бар кызмат адамдарына кошумча санкцияларды киргизгенин жарыялады.

Маалыматка караганда, санкциялык тизмеге ирандык 11 жаран жана төрт уюм кирди. Арасында Адеп-ахлак полициясы, анын эки өкүлү жана иран укук коргоо органдары бар. Алар хижабсыз жүргөнү үчүн кармалгандан кийин каза болгон 22 жаштагы Махса Амининин өлүмүнө байланыштуу башталган нааразылык акцияларды күч менен басууга айыпталууда.

Мындан тышкары санкциялык тизмеге Ирандын маалымат жана технологиялар министри киргизилди. Ал нааразылыктар башталгандан кийин өлкөдө интернеттин өчүрүлүшүнө жооптуу деп табылды.

Брюссель Орусияга учкучсуз учуучу аппараттарды ыктымал берип жатканы үчүн да Тегеранга жаңы санкцияларды киргизүү маселесин талкуулоого даяр экенин билдирди.

Буга чейин Киев Орусияга курал-жарак берүү менен Иран Украинага каршы агрессиянын жана аскердик кылмыштардын катышуучусу болуп каларын билдирген.

Иран согушуп жаткан тараптарга курал бергени тууралуу айыптоолордун баарын четке кагууда. Өлкөнүн Тышкы иштер министрлиги Москвага учкучсуз учуучу аппараттар сатылып жатканы тууралуу маалыматты батыш булактары атайылап таратып жатканын айткан.

WWW.