2,631 Бардыгы /

          ОШ. Ош облусунун Кара-Суу районунда 210 миң сомдук малды уурдаганга шектелип кылмыштуу топ кармалды. Бул жөнүндө Ош облустук ички иштер башкармалыгынан билдиришти.

Маалыматка караганда, ушул жылдын 13-октябрында Кара-Суу райондук милициясына арыз менен 51 жаштагы М.К., 42 жаштагы М.М. жана 33 жаштагы З.О. аттуу жарандар кайрылып, өздөрүнө таандык мал жандыктарын белгисиз жарандар уурдап кеткендигин билдиришкен. Малдардын жалпы суммасы 210 миң сомду түзөт. Ыкчам издөө иш-чараларынын натыйжасында Кара-Суу районунун аймагында малды сатып жаткан жеринен 27 жаштагы М.Б., 31 жаштагы С.И. жана 22 жаштагы А.С. аттуу жарандар кармалышты.

Ошентип, аталган факты Кылмыштардын бирдиктүү реестрине катталып, Кылмыш-жаза кодексинин 205-берененин (“Уурдоо”) негизинде иш козголду. Шектүү жарандар милициянын убактылуу кармоочу жайына киргизилип, алардын мындан башка кылмыштарга тиешеси бар же жок экендиги текшерилүүдө.

Алишер ТОКСОНБАЕВ, өз кабарчы