1,509 Бардыгы /

БАТКЕН. Ушул тапта Баткен облусунун борбору Баткен шаарында Сүлүктү көмүрүнүн БР, же майдараак түрүнүн баасынын килосу 9 сом, ал эми БК, же ири түрү 12 сомдон сатылып жаткан маалы. Бул маалыматты  Монополияга каршы жөнгө салуу мамлекеттик агенттигинин  Баткен облусундагы бөлүмүнүн жетекчиси Арзыкул Дыканов тастыктады. 

– Көмүрдүн кенден чыккандагы баасы 5 сом 50 тыйындан. Жол  жана башка чыгымдары кошулуп, Баткен шаарына жеткенде баасы дагы жогорулайт. Бүгүнкү күндө бааны турукташтыруу боюнча чечим кабыл алынганы турат. Эгерде чечим кабыл алынса, анда ар бир көмүр сатылган базаларда чектөө баасы коюлат, – деди Монополияга каршы жөнгө салуу мамлекеттик агенттигинин  Баткен облусундагы бөлүмүнүн жетекчиси Арзыкул Дыканов. – Жыл ичинде Баткенден  Өзбекстанга 300 миң тонна көмур экспорттолгон. 26-октябрдан баштап көмүрдү экспортоо токтотулду, бул да бааны турукташтырууга өбөлгө болмокчу.

Белгилей кетчү жагдай: 2022-жылдын 24-октябрында Кыргыз Республикасынын аймагынан көмүрдү  автомобиль транспорту менен ташып чыгууга алты айлык мөөнөткө убактылуу тыюу салуу киргизүү боюнча Министрлер кабинетинин токтому чыккан.

Алишер ТОКСОНБАЕВ, өз кабарчы