903 Бардыгы /

БАТКЕН. Баткен облусуна караштуу Кызыл-Кыя шаарында милиция кызматкерлери окуучуларга диний экстремизм менен терроризмдин алдын алуунун жолдорун дагы ыраса түшүндүрүштү.

Ошентип, Кызыл-Кыя ШИИБсынын Экстремизмге жана мыйзамсыз миграцияга каршы аракеттенүү боюнча кызматынын кызматкерлери Кыргыз Республикасынын Президентине караштуу Дин иштери боюнча Мамлекеттик комиссиянын Баткен облусундагы өкүлү Ч.Юсупов, Кызыл-Кыя шаарынын башкы имам-хатиби Н.Топчиев жана милициянын балдар иштери боюнча тескөөчүлөрү менен биргеликте Кызыл-Кыя шаарындагы мектеп окуучуларынын жана мугалимдердин катышуусунда семинар өткөрүштү. Мектеп окуучуларына Кыргызстанда тыюу салынган диний-экстремисттик, террористтик уюмдардын ишмердүүлүгү жана алардын өзгөчөлүктөрү, интернет мейкиндигиндеги диний-экстремизмге жана терроризмге байланыштуу туура эмес маалыматтарды жайылтууда мыйзам тарабынан каралган жоопкерчиликтер, бул багыттарда ички иштер министрлиги тарабынан аткарылып жаткан иштер туурасында дагы маалыматтар берилди.

Баса, мектеп окуучулары арасында активдүү өткөрүлүп жаткан мындай иш-чаралардын эң негзги максаты – жарандарга ислам дининин баалуулуктарын сактоо, диний кастыкты козутуучу чакырыктарга бөгөт коюу, интернет айдыңында диний экстремизмге жана терроризмге байланыштуу маалыматтардын жайылышына таптакыр жол бербөө, улуттар аралык достукту, ынтымакты чыңдоо.

Алишер ТОКСОНБАЕВ, өз кабарчы