КАРАКАЛПАКСТАНДАГЫ ОКУЯЛАР БОЮНЧА АЙЫПТАЛГАНДАРДЫН КӨБҮ КҮНӨӨЛӨРҮН МОЙУНДАРЫНА АЛЫШТЫ

1,281 Бардыгы /

Каракалпакстанда быйыл июлдун башында болгон окуялар боюнча Бухара облустук сотунда өтүп жаткан жараянда шектүүлөрдүн бир бөлүгү күнөөлөрүн толугу менен, калгандары жарым-жартылай мойундарына алышты. Бул тууралуу “Газета.uz” басылмасынын кабарчысы Абдулло Ёдгоров билдирди.

Сотко Каракалпакстан Республикасынын сотунун кылмыш иштери боюнча судьясы Ебулай Абибуллаев төрагалык кылып, отурум каракалпак тилинде өтүүдө. Анын жүрүшүндө 22 айыпталуучунун ичинен 14ү күнөөлөрүн толугу менен мойундарына алса, калганы жарым-жартылай күнөөлүү экенин айтышты.

28-ноябрда Бухарада Нукустагы окуялар боюнча ачык сот жараяны башталган. Анда жалпысынан 22 киши айыпталуучу катары өтүп жатат. Аларга Кылмыш-жаза кодексинин “Атайылап оор зыян келтирүү”, “Атайылап адамдын денесине залал келтирүү”, “Өзбекстандын конституциялык түзүмүнө шек келтирүү”, “Талап-тоноочулук”, “Уурдоо жана бузуу”, “Массалык баш аламандык”, “Бейбаштык” өңдүү 11 берене боюнча айыптар тагылган.

Сот башталганга чейин шектүүлөрдүн 20сы камакта, бирөө үй камагында болсо, дагы бири кепилдик менен эркиндикте жүргөн.

Каракалпакстандын борбору Нукустагы окуялар 1-2-июлда болгон. Анда демонстранттар менен күч түзүмдөрү кагылышып, 516 кармалган. Кийин алардын бир нечеси коё берилген. Тиреште 21 адам каза болуп, 274 адам жабыркаган. Бейрасмий маалыматтарга караганда, жараат алгандардын саны миңден ашкан.

Нааразылык конституциялык өзгөртүүлөргө каршы тутанган. Жаңы сунушталган долбоордо Каракалпакстандын Өзбекстандын курамындагы “суверендүү республика” деген макамы алынган. Мындан сырткары алардын референдум аркылуу өз алдынча бөлүнүү укугу жоюлганы жаткан.

Тополоңдон кийин өзбек парламенти Конституциянын жаңы долбоорунда Каракалпакстандын суверендүү макамын өзгөртүүсүз калтырууну колдогон. Бийлик нааразылык акцияларын күч менен басып, кошумча аскерлер киргизилген. Аймакта августтун башына чейин өзгөчө абал жарыяланган.

Буга чейин Евробиримдик, АКШ, Бириккен Улуттар Уюму жана башка бир катар эл аралык уюмдар Ташкентти Каракалпакстандагы окуяларды бейтарап жана тыкыр иликтөөгө чакырган.