2,184 Бардыгы /

          ЖАЛАЛ-АБАД. Жалал-Абад облусунда алтын кенин казган компаниянын мамлекетке 20 миллион сом зыян келтиргендиги аныкталып, бир бөлүгү өлкө казынасына кайтарылды. Буга улай ишкананын өкүлдөрүнөн тышкары айрым аткаминерлерге дагы кылмыш иши козголду.

          УКМКнын маалымат кызматынан кабарлашкандай, УКМКнын Жалал-Абаддагы башкы башкармалыгы облустагы Экология жана техникалык көзөмөл башкармалыгынын, алтын казган компаниянын жана Жаратылыш ресурстары министрлигинин облустук башкармалыгындагы жооптуу кызматкерлерине Кылмыш-жаза кодексинин 337-беренесинин 3-бөлүмү («Кызмат абалынан кыянаттык менен пайдалануу») боюнча кылмыш ишин козгоду.

          Анткени, Тогуз-Торо районунда алтын казган тоо-кен ишканасы уруксат жана тиешелүү экологиялык паспорттун жоктугуна карабастан экологиялык зыян тарифин жеңилдетилген ставка боюнча төлөп жүргөн. Натыйжада мамлекетке 20 миллион сом зыян келтирилген. УКМК тарабынан бул каражаттын бир бөлүгү өлкө казынасына кайтарылып, ушул тапта тергөө жүрүп жатканы кошумчаланды.

Алишер ТОКСОНБАЕВ, өз кабарчы