1,680 Бардыгы /

10-январда Өзбекстандын президенти Шавкат Мирзиёевдин төрагалыгы алдында өткөн өкмөт жыйынында 2023-жылдын 1-сентябрына чейин Жизакта электромобилдерди чыгара баштоо, Анжиянда металл эритүүчү завод, ал эми Чирчикте машина куруу класстерин ачуу боюнча тапшырма берилди.

Бул тууралуу президенттин маалымат кызматы билдирди.

Жыйында өндүрүш зоналары жана ири инвестициялык долбоорлор үчүн 2023-жылы 1,7 триллион сум (150 миллион доллардан ашык) каражат бөлүнөрү жарыяланды.

Өзбекстан лидери ар кыл тармактагы жаңы мүмкүнчүлүктөрдү колдонуу менен бир жылда өндүрүш көлөмүн 14% көбөйтүү мүмкүн экенин айтты.

Бул тапшырмаларды аткаруу үчүн өндүрүш жана соода министри Лазиз Кудратов жооптуу болот. Министрлик бир ай аралыгында өнөр жай жана инвестиция программаларын кайра карап чыгып, бир катар долбоордорду ишке ашырууну тездетүү чараларын кабыл алат.

1-июнга чейин Пистали кенинде жаңы гидрометаллургиялык завод ишке кирип, августтун аягына чейин Ёшлик-1 кенинде жезди байытуучу фабрика боюнча иштер аягына чыгууга тийиш.

Бул арада Самаркандда жер семирткичтерди чыгаруучу фабриканын курулушун, Навоиде цианид туздары менен техникалык газ чыгаруучу цехтердин курулушун тездетүү тапшырмасы берилди.

WWW.