1,284 Бардыгы /

ЖАЛАЛ-АБАД. Жалал-Абад облусуна караштуу Кочкор-Ата шаарында жаранды коркутуп-үркүтүп, андан акча талап кылгандар акыры кармалышты. Бул тууралуу Жалал-Абад облустук милициясынан билдиришти.

Маалыматка караганда, былтыр декабрь айында милицияга Ноокен районунун 32 жаштагы А.И. аттуу тургуну кайрылып, ушул жылдын 20-декабрь күнү Кочкор-Ата шаарынын «Бакай» аттуу тургуну чалып, 50 миң сом жана бир автоунаа талап кылганын билдирген. Ал «Кочкор-Ата шаарында «смотрящий» боломун, эгерде менин айткандарымды кылбасаӊ, Кочкор-Ата шаарында сенин жашооң кыйын болот. /й-бүлөңө жана өзүнө карата зордук-зомбулук көрсөтүлөт. Айтканыма көнсөӊ, Кочкор-Ата шаарында устачылыгыӊды кылып иштей бересиӊ» деп коркуткан. Ал корконунан «Бакай» аттуу жарандын айткандарын аткарууга «макулмун» деп убадалаган. Жабырлануучу, ошондуктан, аталган жаранга мыйзам чегинде чара көрүүнү суранган.

Ошентип, аталган факты 2022-жылдын 14-декабрында эле каттоого алынып, Кылмыш Кодексинин 208-беренеси (Опузалап талап кылуу) боюнча кылмыш иши дагы козголгон. Ал эми ыкчам иш-чаралардын натыйжасында, Бакай аттуу атуулдун өздүгү такталып, ал Ноокен районунун 34 жаштагы тургуну, мурда Орусияда «каракчылык» фактысы менен сот жоопкерчилигине тартылган Ж.Б. экендиги аныкталды. Ошондой эле, милициядан билдиришкендей, атайын тергөө аракетин жүргүзүү учурунда Кочкор-Ата шаарынын базарындагы ашканада жабырлануучу А.И.ден 20 миң сом акча алып, кетип жаткан жеринен Ж.Б. аттуу жарандын шериктеши, Кочкор-Ата шаарынын 34 жаштагы Т.А. аттуу тургуну кармалган. Ал жабырлануучудан алган 20 миң сом акчаны өз ыктыяры менен чөнтөгүнөн чыгарып берген.

Ошентип, аталган шектүүлөр Ноокен райондук соттун чечими менен бир айга камакка алынышты. Ушул тапта саналган кылмыш ишти соттун кароосуна жиберүү үчүн тергөө аракеттери жүргүзүлүп жатат.

Алишер ТОКСОНБАЕВ, өз кабарчы