1,068 Бардыгы /

ЖАЛАЛ-АБАД. Жалал-Абад облусунун Базар-Коргон районундагы салык көзөмөлүнүн жүрүшүндө акциздик маркаларсыз эле алкоголдук продукцияны ташыган автомашина аныкталды. Бул тууралуу Мамлекеттик салык кызматынан билдиришти.

Аталган факт Салык кызматынын маалыматтык системасы аркылуу электрондук товардык-транспорттук коштомо кагаздын иш жүзүндө таризделиши боюнча ишкердик субьекттерге карата салык контролунун жүрүшүндө аныкталган. Тактап айтканда, маалыматтык системадан автомашинаны текшерүүдө ЭТТК жок экендиги жана кызматкерлер тарабынан автомашинаны текшерүүдө акциздик маркаларсыз алкоголдук продукцияны ташуу фактысы белгиленген.

Бардыгы 9 миң 720 бирдик «стакандагы» алкоголь тартып алынды. Товарлары менен автомашина мөөр басылып, дароо эле айып салынуучу жайга киргизилди. Бузуулардын материалдары Жалал-Абад облусунун облустук прокуратурасына юридикалык баа берүү максатынла өткөрүп берилди.

Белгилей кетчү жагдай: алкоголдук продукцияларды жана тамеки буюмдарын саткан субьекттер 2022-жылдын 15-майынан тартып электрондук товардык-транспорттук коштомо кагазды тариздөөгө милдеттүү.

Алишер ТОКСОНБАЕВ, өз кабарчы