1,566 Бардыгы /

Түркмөнстандын бийлиги эки жыл мурда Түркмөнабад шаарында “Ак боз үй” (“Түркмөндөрдүн ак үйү”) салган жергиликтүү курулуш компаниясына 7 миллион доллардан ашык карызын төлөй элек. Бул тууралуу “Азаттыктын” түркмөн кызматы өз булактарына таянып кабарлады.

“Ак үй эки жыл мурда салтанаттуу түрдө пайдаланууга берилген. Бирок мамлекет бүгүнкү күнгө чейин аны курган “Ажайып Довур” компаниясына тиешелүү сумманы толук төлөп бере элек. Мамлекеттин дагы 25 миллион манат (расмий курс боюнча 7 миллион доллардан ашык) карызы калууда”, – деп билдирген радионун булагы.

Анын айтымында, Ак үйдүн курулушуна жалпысынан 215 миллион манат жумшалган. Бул өлкөнүн Борбордук банкынын курсу менен эсептегенде 61 миллион 420 миң доллардан ашык. Көмүскө базардагы курс боюнча 10 миллион 750 миң долларга жетет.

“Келишимге ылайык, мамлекет объект пайдаланууга берилгенден кийинки 90 күндүн ичинде сумманы толук төлөп бериши керек. Өз кезегинде компания алгачкы эки жылдын ичинде аныкталган мүчүлүштүктөр үчүн жоопкерчилик алат”, – деди булак.

Маалыматтарга караганда, Түркмөнабаддагы “Ак үйдүн” курулушу 2019-жылдын башында башталып, 2021-жылы июнда аяктаган. 3 миң орундуу 40 метрлик “Ак боз үйдүн” ачылышына өлкөнүн ошол кездеги президенти Гурбангулы Бердымухамедов өзү катышкан.

Мамлекеттик басылмалар өлкөнүн бардык аймактарына курулган мындай чоң “Ак үйлөрдү” “бардар жашоонун, бейпилдиктин жана түркмөн меймандостугунун символу” катары мүнөздөп келишет.

Түркмөн бийлиги Түркмөнабад шаарындагы курулуш компаниясына карызын төлөй электиги тууралуу кабар экономикалык кыйынчылыктарды башынан кечирип жаткан өлкөнүн өкмөтү 5 миллиард долларга бааланган жаңы Аркадаг шаарын куруп жаткан маалда жарыяланууда.

WWW.