1,281 Бардыгы /

Азербайжан жикчил Тоолуу Карабак аймагы менен Арменияны туташтырып турган Лачин коридору аркылуу өткөн жолго көзөмөл-өткөрмө бекетин орнотту. Бул тууралуу Азербайжандын Ички иштер министрлиги (ИИМ) менен Мамлекеттик чек ара кызматы билдирди.

Баку Ереванды Тоолуу Карабакка аскер кызматкерлерин, курал-жарак жана ок-дары жеткирүүгө, ошондой эле Азербайжандын аймагынан жаратылыш ресурстары менен маданий баалуулуктарды чыгарып кетүүгө айыптады.

“Армения Орусиянын ортомчулугу менен 2020-жылы ноябрда жетишилген келишимди бузуп жатат. Лачин коридорунун башына чек ара көзөмөлүнүн орнотулушу – андагы мыйзамдуулукту жана кыймылдын ачыктуулугун камсыздайт”, – деп жазылган Азербайжан ТИМинин билдирүүсүндө.

Ошол эле маалда 2020-жылы 10-ноябрда үч тарап кол койгон келишимде Лачин коридоруна көзөмөл-өткөрмө бекетин орнотуу жөнүндө эч нерсе айтылган эмес. Ал Орусиянын тынчтык орнотуу күчтөрүнүн көзөмөлүндө болору жазылган.

Азербайжан ТИМи көзөмөлдүн жаңы механизми орус контингенти менен биргеликте ишке ашырыларын билдирди. Азырынча Орусия тарап көзөмөл-өткөрмө бекеттин орнотулушу боюнча комментарий бере элек.

Ал арада АКШ Бакунун бул аракетине байланыштуу тынчсыздануусун билдирди. Мамлекеттик департаменттин билдирүүсүндө көзөмөл-өткөрмө бекеттин орнотулушу – абалды тынчтык жол менен жөнгө салуу аракеттерине доо кетириши мүмкүн экени белгиленген.

Бир нече айдан бери азери активисттери Лачин коридору аркылуу кыймылды токтотууга аракет кылып келишет. Алар өздөрүн экологдор катары тааныштырып, Армениянын Карабактагы жаратылыш ресурстарын пайдалануусуна каршы экенин билдирүүдө.

Өз кезегинде Армения ТИМи Азербайжанды тынчтык келишимдеринин шарттарын одоно бузууга айыптап, Бакунун мындай аракети “жаңжалды тынчтык жол менен жөнгө салуу боюнча сүйлөшүүлөрдү үзгүлтүккө учуратууга” багытталганын билдирген. “Орусияны Лачин коридорунун аймагынан азери күчтөрүн чыгарып, үч тараптуу келишимдин 6-пунктунда каралган милдеттенмелерин аткарууга чакырабыз”, – деп жазылган мекеменин билдирүүсүндө.

Лачин коридору – Тоолуу Карабакты Армения менен туташтырган жалгыз жол. 2020-жылдагы кагылышуудан кийин кол коюлган үч тараптуу келишимге ылайык, Лачин району Бакунун көзөмөлүнө өткөн. Лачин коридорун Орусиянын тынчтык орнотуучу миссиясы көзөмөлдөмөк болгон.

WWW.