1,614 Бардыгы /

ЖАЛАЛ-АБАД. 2023-жылдын 27-29-апрель күндөрү Жалал-Абад облусунун аймагында “Мал ууру” аталышындагы ыкчам алдын алуу иш-чарасы өткөрүлдү. Рейд учурунда буга чейин катталган бир нече уурулук фактыларынын бети ачылды.

Жалал-Абад ОИИБдин басма сөз кызматы билдиргендей, жабырлануучулардын бири 2023-жылдын 22-апрелине караган түнү үйүнүн короосунан базар баасы 100 000 сомдук тайын уурдаткан. Бул кылмыш ишине шектүү катары Сузак районунун тургуну 1997-ж.т. С.А. кармалган. Ал эми дагы бир Сузак районунун тургуну 2023-жылдын 1-апрелине караган түнү базар баасы 42 000 сомдук тайын белгисиз кылмышкерлер уурдап кеткендигин билдирген. Аталган кылмыш ишине шектелип Сузак районунун тургуну 1970-ж.т. С.И. кармалган. Токтогул районунун аймагынан 2022-жылдын ноябрь айында жайыттан 50 000 сомдук 1 баш букасын уурдаткандыгын айтып жергиликтүү тургун милицияга арыз менен кайрылган. Бул кылмышка шектелип Токтогул районунун тургуну 2004-ж.т. К.М. кармалган.

Ошондой эле Жалал-Абад ШИИБге 1-апрель күнү саат 16:00 чамасында автоунаа жуучу жайдын алдынан базар баасы 10 000 сомдук велосипедин уурдаткандыгын айтып дагы бир жаран кайрылган. Бул факты боюнча Сузак районунун тургуну 1979-ж.т. К.Э. кармалып, убактылуу кармоочу жайга  киргизилген. Тергөөнүн жүрүшүндө шектүү катары кармалган жаран Жалал-Абад шаарынын аймагында бир нече уурулук, тоноо, мал уурулук фактыларына тиешеси бар экендиги аныкталган. Мындан сырткары рейд учурунда мал союлуучу жана эт сатуучу жайлар текшерилип, эл арасында түшүндүрүү иштери жүргүзүлдү.