1,068 Бардыгы /

          ЖАЛАЛ-АБАД. УКМКга караштуу Мамлекеттик Чек ара кызматы Жалал-Абад облусуна караштуу Аксы районунда мал аткезчилиги менен алектенишкендерди кармоо маалында тигилер кадимкидей эле каршылык көрсөтүшкөндүгүн билдирди.

          Маалыматка караганда, ушул жылдын 24-июлунда аталган райондо Кыргыз-Өзбек чек арасынын такталбаган тилкесинен бодо мал айдап өтүүгө аракет кылган адамдардын тобу аныкталган. Кармоо учурунда алар чек арачыларга кадимкидей каршылык көрсөтүшкөн. Алардын мыйзамсыз аракеттерин токтотуу үчүн чек ара күзөтчүлөрү эскертүү иретинде асманга ок чыгарышкан. Бирок. аткезчилер жаалданып, бийлик өкүлдөрүнө кол салууга аракет кылышты. Ушул эле күнү Улуттук коопсуздук комитетинин облустук башкармалыгы бул фактыга байланыштуу «Экономикалык аткезчилик», «Чек арадан мыйзамсыз өтүү» жана «Бийлик өкүлдөрүнө карата зомбулук же аларга коркунуч жаратуу» беренелери менен кылмыш ишин козгоду. Бул кылмышка тиешеси бар деп шек саналган беш адам дароо кармалды.

          Айтмакчы, ушул жылдын май айында Аксы райондук ички иштер бөлүмүнүн башчысынын орун басары, эки кызматкери жана аймактагы чек ара тозотторунун үч командири контрабанданы уюштурган жана көмөктөшкөн деген шек менен кармалган. Атайын кызмат аймакта уурдалган малды Өзбекстанга айдап өтүү көбөйгөндүгүнөн улам текшерүү жүргүзүлгөнү, анда камалган адамдардын буга катыштыгы болгондугун маалымдаган. Кыргыз-Өзбек жана Кыргыз-Казак чек арасында мыйзамсыз бодо мал айдап өткөн, а түгүл өтүүгө аракет жасаган учурлар буга чейин дагы катталган. Чек арадагы аткезчиликтин айынан ок атылган, адам өлүмү менен аяктаган фактылар дагы жүз берген.

          Алишер ТОКСОНБАЕВ, өз кабарчы