1,011 Бардыгы /

БАТКЕН. Чек арадагы жаңжалдан жапа чеккендерге жардам көрсөтүү максатында ачылган «Баткенге жардам» атайын эсебине 2022-жылдын 16-сентябрынан 2023-жылдын 15-августуна чейин 354 миллион 348 миң сом акча топтолду. Мунун ичинен 327 миллион сомго жакыны сарпталгандыгын Президенттин Баткен облусундагы ыйгарым укуктуу өкүлчүлүгүнөн кабарлашты.

Расмий мааламатька караганда, атайын эсептен өрттөлгөн 437 үй ээлерине жана капиталдык ремонтко муктаж 241 турак жай ээлерине 200 миң сомдон акча каражаты төлөнгөн. Курулушу аяктап пайдаланууга берилген 411 үй ээсине дагы 100 миң сомдон таратылган. Окуяда жол кырсыгынан каза тапкан 12 жаранга 3 миллион 960 миң сом, жабыркаган 22 жарандын дарылануусуна 935 миң сом бөлүнгөн. Лейлек районунун Кулунду базарын калыбына келтирүү жана өнүктүрүү максатында 2 миллион сом берилген. Жабыр тарткан жарандардын балдарына гуманитардык жардам көрсөтүү багытында 58 миң 780 сом ажыратылды.

Ал эми өрттөлгөн, уурдалган мал жандыктарынын жана автотранспорт каражаттарынын ээлерине келтирилген зыяндын ордун толтуруу максатында жалпы жонунан 599 жаранга 122 миллион 280 миң 230 сом акчалай компенсация дагы төлөнүп берилди. Баткен районунун Достук айылындагы күнөскананы калыбына келтирүүгө 764 миң 594 сом бөлүнгөн. Мындан тышкары 4 миллион 600 миң сомдон ашык каражаты калыбына келтирүү иштеринде күйүүчү майга, унаа каттамын уюштурууга, жабыркаган жарандардын балдарын эс алууга жиберүүгө, эвакуация болгон жарандардын азык түлүгүнө, муктаждыктарына жумшалды. Ушул сааттарга карата атайын эсепте 27 миллион 602 миң 632 сом гана калды.

Алишер ТОКСОНБАЕВ, өз кабарчы