942 Бардыгы /

ОШ. Ош шаарына караштуу Амир-Темир кичи районунда 60 жаштагы кишинин Өзбекстандын президенти Шавкат Мирзиеевге атайын кайрылуусуна байланыштуу калаа милициясынын жетекчилигинин катышуусунда жергиликтүү тургундар менен атайын жыйын өткөрүлдү.

Ош шаардык ички иштер башкармалыгынын маалыматына караганда, жергиликтүү жашоочулардын бардыгы бир ооздон коӊшу мамлекеттин өлкө башчысына кайрылган жердешинин жоругун туура эмес деп сындашты. А түгүл алар «Бул – провокатор, эл бузар, журт бузар! Элдерибиз эми кайрадан ынтымакта жашап келе жатышканда, мындай сөздөрдү айтуу туура эмес! Бүтүндөй кичи шаарчабызды элге жек көрсөттү. Өзүбүздун шаардын, өлкөнүн жетекчилиги турганда коӊшу мамлекеттин жетекчисине арыздануунун эмне зарылчылыгы бар эле? Жаш адам болсо бир жөн. 60 жштагы аксакалды бүтүндөй жашоочулар жаман көрүп жатышат. Биз эми мындай адамдын жакшылыгына дагы, жамандыгына дагы барбайбыз!» — дешти аталган жыйындын катышуучулары бир ооздон.

Эске салчу жагдай: буга дейре Ош шаарынын тургуну Өзбекстандын президенти Шавкат Мирзиеевге атайын Видео кайрылуу жасап, анын токтоосуз Ош шаарына келүүсүн суранган эле. Бул видео социалдык тармактарга дагы кеңири жарыяланган.

– Он-Адырга келип, тарыхта кала турган нерсени жасасаңыз жакшы болмок. Биз бардыгын ачык айтмакпыз. Бизге кам көрүшпөйт, документтер, жолдор каралбайт. Улутчулдук чектен ашып кетти. Мүмкүн бул жөнүндө билесиз. Документтерге атайын ката жазышат. Бизди шылдыңдашат. Азыркы күндөрдө ушундай болуп жатат! — деген видеоКайрылуусунда Түштүк башкалаасынын тургуну.

Кыскасы, Кыргызстандын Түштүк башкалаасындагы  Амир-Темир кичи районунун жашоочулары соңку сааттарда 60 жаштагы карыянын – жердешинин  укук коргоо органдары тарабынан мыйзам чегинде токтоосуз жазаланышын дагы катуу талап кылып жатышат.

Алишер ТОКСОНБАЕВ, өз кабарчы