1,149 Бардыгы /

БАТКЕН. Улуттук коопсуздук боюнча мамлекеттик комитети (УКМК) Баткен облусунда лотереяны мыйзамсыз уюштургандар кармалгандыгын шардана кылды.

УКМКнын басма сөз кызматынын маалыматына караганда, УКМК милиция менен чогуу жүргүзгөн ыкчам-иликтөө иштеринин алкагында Баткен районунун Самаркандек айылынын тургуну К.у.К. жана бул ишке тиешеси бар башка дагы адамдар кармалышты. Уюштуруучулар жалпы баасы 8 миллион сомдон ашкан 2 миң 800 билет сатышкан. Алар лотереяны YouTube аркылуу ойнотуп, төлөмдөрдү он-лайн түрүндө гана алып турушкан. Бул фактынын негизинде «Мыйзамсыз ишкердик кылуу» беренесине ылайык кылмыш иши козголду. Уюштуруучулардын жашаган жерин тинтүү маалында лотереялык барабандар, ойнотулуучу унаалардын документтери, лотерея билеттери жана бул ишке тиешелүү башка дагы документтер табылды.

УКМК быйыл март айында ушундай эле кылмышка шектелип Ош облусунун эки тургуну дагы кармалгандыгын билдирген эле. «Лотереялар жөнүндө» мыйзамга ылайык, лицензия албай туруп Кыргызстандын аймагында лотереяларды ойнотууга таптакыр тыюу салынган.

Алишер ТОКСОНБАЕВ, өз кабарчы