939 Бардыгы /

Тажикстан Кыргызстан менен чектеш райондору аркылуу өткөн жолду оңдой баштады. Бул тууралуу “Озоди” радиосу кабарлады.

Согд облусунун Кыргызстан менен чектешкен төрт району аркылуу өткөн жолдун узундугу 50 чакырымдан ашат. Жолдун бир бөлүгү Кыргызстандын Лейлек жана Тажикстандын Бобожан Гафуров райондорунун аймактары аркылуу өтөт. Жолдун бир тарабында Кыргызстандын Арка жана Борбордук айылдары жайгашса, экинчи тарабында Тажикстандын Хистеварз конушу бар. Бул жолду эки өлкөнүн жарандары тең пайдаланат.

Жолду оңдоо иштери менен China Railway кытай компаниясы алектенүүдө. Быйыл март айында башталган иштер үч жылда аяктайт деп күтүлүүдө. Долбоорду Дүйнөлүк банк менен тажик өкмөтү каржылайт.

Тажикстандын Транспорт министрлигинин өкүлү Алишер Абдуллоев долбоор аяктаганга чейин эки өлкөнүн чек арасы такталып, жол курууда эч кандай маселе жаралбайт деген үмүтүн билдирди.

“Азыр коңшу өлкөнүн чек арасында иштеген жокпуз. Чек арадан 50 метрден алыс жерде иш жүрүп жатат. Жолдун Гафуров-Хистеварз бөлүгү эң оор. Биз талаштуу тилкелерге кирбейбиз. Ага чейин чек аралар такталып, жол курууда тоскоолдуктар болбойт деп үмүттөнөм”, – деди Абдуллоев.

Азырынча оңдоло турган бул жолдун канча чакырымы такталып, канчасы талаш экени белгисиз.

WWW.