942 Бардыгы /

          БАТКЕН. Улуттук коопсуздук мамлекеттик комитети (УКМК) энергетика тармагындагы каржылык көз боёмочулуктун бетин ашкереледи. Расмий маалыматка караганда, УКМК тарабынан коррупцияга каршы иш-чаралардын жүрүшүндө, Баткен районунун электр тармактар ишканасынын электр энергиясын керектөөгө жана төлөмдөрдү эсептөөгө байланыштуу каржылык алдамчылык фактылары аныкталды.

           Такталгандай, Баткен облусунда электр энергиясын керектөө үчүн узак убакыт бери төлөмсүз, бир катар коммерциялык жана коммерциялык эмес абоненттер бар экенидиги аныкталды. Алардын айрымдары Баткен Райондук электр тармактарынын кызматкерлеринин патронажынан пайдаланып, акча төлөөдөн бошотулуп, жарыкты өчүрүүдөн дагы качышкан. Алдын ала эсептөөлөр боюнча, акыркы бир нече жылда жылына 10 миллион сомго чейин карыздар түзүлүп келген. Карыздарды жабуу максатында Баткен РЭТ кызматкерлери Баткен шаарынын жана Баткен районунун билим берүү бөлүмдөрүнүн кызматкерлери менен келишим түзүшкөн, ошондой эле электр энергиясын формалдуу түрдө кошумча керектөө үчүн башка мамлекеттик органдардан мыйзамсыз төлөмдөр алынган.

           Ошентип, бул мамлекеттик мекемелер мыйзамсыз чегерүүлөрдү мамлекеттик бюджеттен накталай төлөшкөн. Ушул тапта жоруктардын бардык жагдайларын чекесинен аныктоо боюнча тиешелүү ыкчам-тергөө иш-чаралары жүргүзүлүүдө.

Алишер ТОКСОНБАЕВ, өз кабарчы