1,401 Бардыгы /

Казакстан Республикасынын Алма-Ата шаарындагы көп кабаттуу үйлөрдүн биринде өткөн аптада өрт кырсыгы катталып, анда кыргыз улутунун 6 жашар баласынын өмүрү сакталып калды.

Алоолонгон отко, көз ачырбаган коюу түтүнгө карабай өз өмүрүн тобокелге салып 6 жашар баланы уктап жаткан жеринен Тешебай Жалилов алып чыккан.

Тешебай Жалилов Ош областынын Өзгөн районуна караштуу Жалпак- Таш айыл өкмөтүнүн Кара-Тарык айылынын тургуну. Ал Казакстан Республикасына жакынкы айларда гана барган. Ал эми өрт кырсыгына кабылган үй-бүлө ээси Жылдызбек да Өзгөн районунун тургуну болгон. Бир топ жылдан бери аталган мамлекетте базарда соода- сатык иштери менен алектенет. Үйдү батирге алып жашап жаткан.

Тешебай Жалиловдун айтымында өрт кырсыгын көрөөр замат ал жакта жаш бала бар экенин угуп, эч нерсеге карабай баланы куткарууга кирип кеткен. Өрт чыгып жаткан үй кайсы улуттун өкүлүнө тиешелүү экендигин билген да, ал ойду ойлогон да эмес. Жыйынтыгында кыргыздын кулунун болгондо жа Өзгөн районунун тургунун сактап калган.

“Коюу кара түтүн көп кабаттуу үйдүн кирүү жолдорун бүт каптаган, оозумду кийимим менен байлап кирип, баланы үйдүн четки бөлмөсүнөн алып чыктым. Кырсыкта мүмкүн казак, мүмкүн орус улутунун жараны болсо да жардам кылмакмын” -дейт Тешебай Жалилов.

Тешебай Жалиловдун баатырларча жасаган эрдиги үчүн Өзгөн районунун  Жалпак Таш айыл өкмөтү аймактын баатыр уулуна  “Ардактуу атуул” наамы, төш белгисин ыйгарды. Мындан сырткары Медеткан Шеримкуловдун колу менен Кыргыз Республикасынын “Эгемендүүлүк каарманы” деген диплому тапшырылды.

Тешебай Жалиловдун жасаган ишине Алма-Атадагы мигранттар баш ийип, таазим кылышкан. Ошону менен бирге мындагы кыргыз улутундагы бир туугандай болгон мигранттар жапа чеккен жигитке материалдык жардамын аяшпай кол сунушууда.

Нургүл АБДЫЛДАЕВА, “Аймак”