1,515 Бардыгы /

  ОШ. Кечээ. 31-августта президент Садыр Жапаров Ош облусундагы Төлөйкөн ипподромунда өлкөнүн эгемендүүлүгүнүн 32 жылдыгына карата уюштурулган аламан байге ат чабышынын жеңүүчүлөрүн салтанаттуу түрдө өзү сыйлады.

          Мамлекет башчы алыскы аралыкка ат чабуунун катышуучуларын жана бардык келгендерди Эгемендүүлүк күнү менен кызуу куттуктап, бул күнү ат оюндары боюнча Президенттин кубогун өткөрүү жалпы кыргыз эли үчүн жакшы салтка айлангандыгын баса белгиледи. Мамлекет башчысы Ош облусунун ипподрому бүгүнкү күндө миңдеген адамдарга толуп турганын белгилеп, муну менен улуттук ат оюндарынын ар бир жигиттин жашоосундагы ордун ырастады. Көчмөн кыргыз эли эзелтеден жылкыны баалап келген, алар бүгүнкү күнгө чейин элибиздин турмушунун ажырагыс бөлүгү катары эсептелинет. Кошумчалай кетсек, кыргыздар байыртадан бери эле улуттук спорттун түрлөрүн күнүмдүк турмушуна жигердүү аралаштырып келет, анын максаты келечек муундарды чыдамкайлыкка, эрдикке, баатырдыкка, күрөшкө жана ар-намыска тарбиялоо болгон.

       Президент  Садыр Жапаров баса белгилегендей, ата-баба салтын улай бүгүн Эгемендүүлүк күнүнө карата спорттун улуттук түрлөрү боюнча мелдештер өткөрүлүп, анда эң күчтүү жана татыктуу күлүктөр 32 чакырым аралыкты басып өтүп, маарага жетишти. Сөзүнүн соёунда мамлекет башчысы ата-бабалардын ыйык салтын улантып келе жаткандарга ыраазычылык билдирип, улуттук оюндарыбыз өнүгүп, дүйнөгө таанымал болушун гана тиледи.

       Ошондой эле Президент Садыр Жапаров «Достук» жана «Ынтымак» командаларынын ортосундагы көк бөрү боюнча Кыргызстандын Президентинин Кубогунун финалдык беттешине өзү кошо күбө болду.

Алишер ТОКСОНБАЕВ, өз кабарчы