1,092 Бардыгы /

Орусиянын Тергөө комитетинин башчысы Александр Бастрыкин орус паспортун алып, бирок Украинадагы согушка баруудан баш тарткан мигранттарды жарандыктан ажыратууну сунуштады. Бул тууралуу аталган мекеменин басма сөз кызматы билдирди.

“Аларды атайын аскердик операцияга тартуу керек деп ойлойм. Орусиянын жараны болуп туруп өзүнүн аскердик милдетин аткарууга даяр эмес болсо, анда мындай адамдарды жарандыктан ажыратуу зарыл”, – деди Бастрыкин.

Кремл Украинадагы согушка мигранттарды жөнөтүп жатканы алгач бир жыл мурда белгилүү болгон. 2022-жылы октябрда укук коргоочу Валентина Чупик Москвадагы “Сахарово” миграциялык борборунда мигранттар кол коюшу керек болгон документтердин арасына согушка катышуу тууралуу келишимди да тымызын кошуп жиберип жатышканын айтып чыккан. Быйыл августта Орусиянын бир нече аймагында жакында эле орус жарандыгын алып, бирок аскердик каттоого турбаган эркектерди аныктоо боюнча рейддер өткөн.

Кийинчерээк Украинадагы согушка эркек мигранттар гана эмес, аялдар да тартылып жатканы белгилүү болгон. Борбор Азия өлкөлөрүнөн барган аялдарга көп маяна убадалап, Украинанын оккупацияланган аймактарындагы аскердик бөлүктөрдө медайым же ашпозчу болуп иштөө сунуштала баштаган.

Орусиянын президенти Владимир Путин “Орусия Федерациясынын жарандыгы тууралуу” мыйзамдын жаңы редакциясына быйыл апрелде кол койгон. Ага ылайык, жапырт башаламандыктарга катышкандар, митингдер тууралуу мыйзамды кайталап бузгандар, “чет элдик агент” мыйзамын аткарбагандар, согуш тууралуу “жалган маалымат” тараткандар, орус армиясын “дискредитация” кылгандар жана аскердик кызматтан баш тарткандар орус жарандыгынан ажыратылат.

Документте мындай чара жарандыкты төрөлгөндө эмес, кийин алгандарга карата колдонулары белгиленген. Орусиянын Конституциясына ылайык, өлкөнүн аймагында төрөлгөн адамды жарандыктан ажыратууга болбойт.

Бул мыйзам боюнча жарандыктан ажыратылгандар кайра орус жарандыгын алуу өтүнүчү менен тиешелүү органдарга үч жылдан кийин гана кайрыла алышат.

Орусияда 2017-жылы терроризм жана экстремизм үчүн соттолгондорду жарандыктан ажыратуу тууралуу мыйзам кабыл алынган.

WWW.