1,311 Бардыгы /

Өзбек бийлиги өздөрүн “халал” катары көрсөтүп, кардарларга спирт ичимдиктерин сатпаган 10 ресторанды жапты.

Коомдук тамактануучу жайлардын ээлери күч кызматкерлери аштизмеге алкоголдук ичимдиктер киргизилсе, ресторандар кайра ачыларын айтышканын билдиришүүдө.

Бир нече бизнесмен “Озодлик” радиосуна кабарлагандай, ушул айда ички иштер органдары менен коопсуздук кызматтарынын өкүлдөрүнүн, салыкчылардын күтүүсүз рейддеринен кийин ресторандары жабылган.

“Санитардык-эпидемиологиялык станция ашкананы, салык инспекторлору кассаны жана документтерди текшерди. Коопсуздук кызматкерлери ресторандын намазканасын карап чыгып, кызматкерлерден диний көз караштары боюнча сурашты жана ал тургай уюлдук телефондорун дагы текшеришти”, — дейт Ташкенттик ишкерлердин бири.

Атын атагысы келбеген бизнесмен инспекторлор рейд өткөрүүгө уруксат берген расмий документтерди көрсөтпөгөнүн айтты.

Мындан соң ресторан “убактылуу” жабылган. Ишкердин айтымында, санэпидемиологдор буга жүйөлүү себеп келтире алган эмес.

“Оздоликтин” кабарчылары менен баарлашкан дагы бир нече кафе-ресторандардын ээлери да рейд жүргөнүн, тамактануу жайлары жабылганын айтып беришти.

Жабылган жайлар Ташкенттин ар кайсы райондорунда жайгашкан, бирок аларды бириктирген нерсе – спирт ичимдиктерин сатпаганы. Бардык ресторандар өздөрүн “халал” катары көрсөтөт жана кардарлар үчүн намазканалары бар.

“Оздолик” бул маселе боюнча Ташкенттеги аткаминерлерге кайрылып, бирок жооп ала алган жок.

Рестораторлордун пикиринде, кардарлардын атын жамынып, жашыруун текшерүүлөр болгон, жыйынтыгында рейд жүргүзүү үчүн ресторандардын тизмеси түзүлгөн. Күч түзүмдөрү коомдук тамактануу жайларынын ээлерине спирт ичимдиктерин сатууга лицензия алууну жана барларды ачууну, “адал тамак-аш” деген жазуусу бар бегилерди алып салууну сунушташкан.

Бул чара бийликтин “диний радикалдашууга” карата тынчсыздануусунун жыйынтыгы экени айтылууда.

Эл аралык Human Rights Watch уюмунун соңку баяндамасында Өзбекстан дин эркиндигин чектеген өлкө катары сыпатталган.

WWW.