1,587 Бардыгы /

ОШ. Кара-Кулжа районунун эң алыскы Алайкуу Айыл Өкмөтүнө караштуу Кан-Коргон айылында Ыса Карабаев атындагы китепкана бар. Бул китепкана Кара-Кулжа райондук Акун Токтосартов атындагы борборлоштурулган китепкананын № 21-филиалы болуп эсептелет. Аны Самара  Саадалова жетектейт.

Тоо койнунда жайланышкан бул элеттик китепкана замандан шарынан артта калбастан талаптагыдай гана иш жүргүзүп келатат. Китеп фондун көбөйтүү, окурмандарды маданияттуу тейлөө иш-аракеттери дагы мактоого таатырлык.

– Ыса Карабаев атындагы айылдык китепкана Кан-Коргон айылындагы 1951-жылы түптөлгөн. Бирок, атайын имараты жок болгондуктан, ар жерге көчүп-конуп жүрүп 2013-жылы гана айылдык жеке ишкер Остербек Карабаев тарабынан 600000 сомго жаңы заманбап имарат салынып, пайдалануга тапшырылган. Ошондон тартып, жигердүү иш алып баруу менен айыл элинин бирден бир маданий борборго айландык. Ушул тапта китепканада жыл сайын 700-800 окурман тейленет. Китеп фонду 8000 китеп. Көркөм адабияттар, айыл жана токой чарба, коомдук саясий, медицина, искусство жана башка ушул өңдөнгөн китептер дагы  бар. Алардын негизин кыргыз тилдүү, орус тилдүү жана башка тилдердеги китептер түзөт. Мындан сырткары, китеп фонду демөөрчүлөр тарабынан кыргыз тилдүү көркөм адабияттар менен дагы толукталды, – деди Кара-Кулжа райондук Акун Токтосартов атындагы борборлоштурулган китепкананын № 21-филиалынын –  Ыса Карабаев атындагы китепкананын  директору Самара Саадалова.

Бүгүнкү күндө Кара-Кулжа райондук Акун Токтосартов атындагы борборлоштурулган китепкананын № 21-филиалынын –  Ыса Карабаев атындагы китепкананын китеп фондунда 8000ден ашуун китеп бар. Китепканада ЮНИСЕФ менен биргеликте «Балдарды эрте куракта өнүктүрүү борбору» дагы түзүлүп, бул өңүттө дагы тиешелүү иштер алып барылууда.

Алишер ТОКСОНБАЕВ, өз кабарчы