1,209 Бардыгы /

Самарканд облусунун Каттакурган райондук соту “президенттин дарегине кемсинтүүчү комментарий жазган” 19 жаштагы тургун Дилшод Искандаровду 2,5 жылга эркинен ажыратты. Бул тууралуу “Озодлик” радиосу кабарлады.

Иштин материалдарына ылайык, быйыл жайдын башында Орусияда иштеп жүргөн Искандаров “Инстаграмга” жарыяланган президент Шавкат Мирзиёевдин үй-бүлөсү тууралуу видеонун алдына “Ш.М. Мирзиёев сенин укум-тукумуңа…” деген комментарий калтырып, кийин аны кайра өчүрүп салган.

Өзбекстандын Юстиция министрлигине караштуу Соттук экспертиза борбору Искандаровдун бул комментарийинде “президентти кемсинтүүгө жана беделин түшүрүүгө багытталган аракеттер бар” деген корутунду чыгарган.

2022-жылы ноябрда Орусияга кеткен Дилшод Искандаров Өзбекстанда ага каршы кылмыш иши козголгонун уккандан кийин быйыл августта мекенине кайтып келген.

Сотто Искандаров күнөөсүн мойнуна алганы айтылды. “Ал Шавкат Мирзиёевдин саясатына каршы эмес экенин, болгону жаштык кылып, түшүнбөстүктөн президент тууралуу жаман пикир жазганын айтты”, – деп жазылган соттун өкүмүндө.

Соттун чечими менен соттолуучунун “Инстаграм” социалдык түйүнүндөгү баракчасы да бөгөттөлдү.

2022-жылы январда Ферганадагы газ тартыштыгына даттанып, “Коканд метан газ” телеграм-тайпасына үн билдирүүсүн жөнөткөн 27 жаштагы Уткирбек Собиров аттуу тургун үч жылга соттолгон.

“2022-жылы 27-январда Собиров жаратылыш газы менен электр энергиясынын тартыштыгынан улам өлкөдө жүргүзүлүп жаткан саясатка нааразылыгын билдирип, Өзбекстандын башчысын бийликтен кетирүү керектигин айткан. Бул сөздөрү менен ал мыйзамдуу шайланган президентти бийликтен кетирүүгө ачык чакырык жасаган. Мындан тышкары ал тайпанын катталуучуларын Кокон шаарына митингге чогулууга чакырган”, – деп жазылган сот өкүмүндө.