756 Бардыгы /

          Сузак райондук милициясы аялына зордук-зомбулук көрсөткөн тургунду убактылуу кармоочу жайга киргизди. Бул туурасында  Жалал-Абад облустук ички иштер башкармалыгынын басма сөз кызматынан маалымдашты.

          Маалыматка караганда, үстүбүздөгү жылдын 17-январь күнү саат 22:00 чамасында Сузак районунун Көк-Арт айыл өкмөтүнүн тургуну, 38 жаштагы келинди үйүндө уруша кеткен жолдошу көз тарабына сүзүп, балка менен желке тарабына уруп, денесине жаракат келтирген. Келин алган жараатынын кесепетинен Сузак районунун Октябрь аймактык ооруканасына дароо жаткырылган. Бул жоруктун негизинде Сузак милициясы Кылмыш-Жаза Кодексинин «Уруп-сабап кыйноо» беренеси менен кылмыш ишин козгоп, Көк-Арт айыл өкмөтүнүн 49 жаштагы тургуну кармалды.

          Баса, күйөөсү алгачкы көрсөтмөсүндө, аялы баласын уруп жаткандыгына ачууланып, колунан кармап жулкулдатып, башы менен көз тарабына сүзүп жибергендигин дароо моюндаган. Ошол убакта аялы бөлмөдө турган балка менен бут тарабына урган убакта, анын колунан балканы алып, кайра аялынын желке тарабына ургандыгын дагы кошумчалады. Мындан тышкары жолдошу  эртеси Тез жардам кызматын чакырып, аялын аларга кошуп бергендигин дагы айтты. Адепки тергөө амалдарынын жүрүшүндө күйөөсү аялына буга чейин дагы зордук-зомбулук көрсөтүп келгендиги, аялы эч жакка арыз жазбай жүргөндүгү дагы ашкереленди.

          А буга дейре Ички иштер министрлиги өткөн 2023-жылы Кыргызстанда 13 104 үй-бүлөлүк зомбулук фактысы катталгандыгын шардана кылган. Бул көрсөткүч 2022-жылдагыдан дээрлик 32,6 пайызга көп. 2022-жылы жалпы өлкө боюнча үй-бүлөлүк зордук-зомбулуктун 9880 учуру катталган. Дүйнөлүк WPS (Тынчтыктын жана аялдар үчүн коопсуздуктун Индекси) уюмунун адам укугу боюнча рейтингинде Кыргызстан эки жыл катары менен кыз-келиндер үчүн эң кооптуу өлкө деп аталды.

Алишер ТОКСОНБАЕВ, өз кабарчы