36 Бардыгы /

Баткен шаарында Кыргызстан менен Тажикстандын Кыргыз-Тажик мамлекеттик чек арасын делимитациялоо жана демаркациялоо боюнча өкмөттүк делегацияларынын укуктук маселелер жана топографиялык жумушчу топторунун кезектеги жолугушуусу аяктады. Бул туурасында Кыргыз Республикасынын Министрлер кабинетинин басма сөз кызматынан кабарлашты.

Эки тараптуу жолугушуу ушул жылдын 11-сентябрында башталып, 17-сентябрда аяктады. Кездешүүнүн алкагында тараптар калган тилкелерде Кыргыз-Тажик мамлекеттик чек ара сызыгынын өтүшүн сыпаттоо боюнча сунуштар менен алмашышты. Эми кийинки жолугушуу Тажикстандын аймагында өткөрүлөт.
Баса, Министрлер кабинетинин төрагасы Акылбек Жапаров Кыргыз-Тажик чек арасын тактоо жыйынтыктоочу баскычка келгенин Өкмөттүн 19-августтагы кеңешмесинде билдирген эле. Мунун алдында тышкы иштер министри Жээнбек Кулубаев Кыргызстан менен Тажикстандын чек арасында эки өлкөнүн жарандары өткөн эки-үч транзиттик тилке боюнча сүйлөшүүлөр жүрүп жаткандыгын маалымат жыйында шардана кылган. Өкмөт мүчөсү Кыргыз-Тажик чек арасы боюнча эки-үч айда жыйынтык болоорун баса белгилеген.

Айтмакчы, Кыргызстан менен Тажикстандын чек арасынын жалпы узундугу 972 чакырым. 2022-жылы президенттер жолукканда мунун 664 чакырымы боюнча орток пикир табылгандыгын жарыялашкан. Чек ара биротоло такталбагандыктан, буга дейре суу, жер, жол, жайыт талаштан улам аймакта көп чыр-чатак чыккан. 2021-жылы апрель-май жана 2022-жылы сентябрь айларында кандуу кагылышуулар болгон.

Алишер ТОКСОНБАЕВ өз кабарчы