12 Бардыгы /

Ош облусунун Жарандык коргонуу мамлекеттик тутумунун башкаруу органдары менен командалык-штабдык машыгуусу абдан кызуу өтүп жаткан чагы. 

Өзгөчө кырдаалдар министрлигинен билдиришкендей, таёкы 7:30да берилген айгай боюнча райондук жарандык коргонуу кызматтарына Ноокат районунун Тажибай ата атындагы орто мектебинин спорт аянтчасына чогулушту. Анда «Өзгөчө кырдаал коркунучу жаралганда жана катталган учурда Жарандык коргонуунун башкаруу органдарынын аракети» темасында чоң машыгуу уюштурулду.

Жалпысынан иш-чарага 256 кызматкер, 27 инженердик жана атайын техника, ошондой эле 30 куткаруучу жана 3 куткаруу техникасы катышты. Машыгууда жер титирөөнүн кесепетинен өрт кырсыктары катталып, электр мамычалары жана имараттар жабыркагандыктан куткаруу жана эвакуациялоо иштери дагы практикалык түрдө көрсөтүлдү.

Айтмакчы, Ош облусундагы команда-штабдык машыгуу ушул апта акырында жыйынтыкталат. Машыгуулар жарандык коргонуу системасынын бардык деңгээлдериндеги кызматкерлердин ыкчам аракеттерди көрүү жөндөмүн жогорулатуу жана жарандардын коопсуздугун камсыз кылуу максатын гана көздөйт.

Алишер ТОКСОНБАЕВ өз кабарчы