27 Бардыгы /

Өмүр бизден өтүп кетсе,

Эл эмгектен эскерсин!

Аалы ТОКОМБАЕВ,

Кыргыз Эл акыны.

Кыргыз тарыхында дегеле мындай болгон эмес! Эбак эскилиги жеткен эле. Ошондуктан, Кыргыз Республикасынын Министерлер кабинетинин чечимине ылайык Ош облусуна караштуу Араван райондук мамлекеттик архивине заманбап имарат салынып, ушул тапта абдан ыңгайлуу шартта гана пайдаланылууда. Эң кызыгы: аталган мекемеде жалаң гана ак жоолукчандар эмгектенишет. Ошол себептүү кардарларды – зарыккандарды аялзатынын өкүлдөрү сылык-сыпаа жана дагы өтө малданияттуу гана тейлеп жатышкан чагы.

Жылдыз БАХРИЕВА, Араван райондук мамлекеттик архивинин архивариусу:

– Мен Батыраалы Сыдыков атындагы Кыргыз-Өзбек университетинин  маалымат системасы адистигин бүтүргөмүн. Ушул кесибимдин мага азыр куп гана пайдасы тийип жатпайбы. Маал-маалы менен мекеме-уюмдарды жана ишканаларды тегиз кыдырып, документтердин коопсуз жайда сакталышын жеринде гана текшерип, а түгүл аларга усулдук жардамдарды деле толук кандуу жана ар тараптуу көрсөтүп гана келатабыз.

Жаңылай НАРБАЕВА, Араван райондук мамлекеттик Архивинин Фондду сактоочусу:

– Буга дейре мен Ош Аймактык архивинде тескөөчү, уюштуруу жана кадрлар бөлүмүнүн башчысы кызматтарын аркалагамын. Архив – бул Адамзат тарыхы. Ошентсе дагы, бул маанилүү тармакка мурун дегеле жетиштүү көңүл бурулган эмес экен. Президентибиз Садыр Жапаровдун акылман саясатынын негизинде эми гана коомубуздагы өз ордубузду толук кандуу таап олтурабыз. Ал эми мекеме-уюмдардын жана дагы ишканалардын иш кагаздары бүт өздөрүнүн ведомстволук архив бөлмөлөрүндө бара-бара заман талабына ылайыкташтырылып сакталып атат. 

Мээргүл АЛИБАЕВА,  Араван райондук мамлекеттик Архивинин архивариусу:

– Бүгүнкү санариптештирүүнүн баштапкы талабына ылайык архивибиздеги бардык документтерди бир-бирден компьюетрге түшүрүп, интернетке дагы киргизип, чекесинен ирээттештерип гана жатабыз. Мекендештерибиз бара-бара керектүү маалыматтарды он-лайн форматта деле алганга акыры мүмкүнчүлүк түзүлөөрү шексиз! 

Шырманай МАМАТОВА,  Араван райондук мамлекеттик Архивинин башчысы:

– Көрдүңүздөр го. Биздин архивибибизде өткөн кылымдын 1932-жылынан берки документтер дагыле сакталат. Санариптештирүү жана электрондук маалымат алмашуу көптөгөн убакытты талап кылат экен. Ошондой эле буга олчойгон каражат деле сарпталат турбайбы. Маселен, биздин заманбап сканерибиз жок. А мындай жабдык Ош шаарында – Аймактык башкармалыгыбызда гана бар. Аргасыздан зарыкканда ошол жакка убара чегебиз. Ал эми иш-кагаздарын туура эмес жүргүзгөн мекеме-уюмдарга 5000  сом айып пул салынат. Буга улай мекеме-уюмдар жана ишканалар документтерин мамлекеттик сактоого – биздин архивге өз маалында тапшырышпаса, 17 000 сом, же документтерди атайылап жаап-жашырышса 55 000 сом айыпка жыгылышат. Ошондуктан, биз деле жөн-жай жатпастан, жеринде усулдук жана укуктук жардамдарды дагыле үзгүлтүксүз гана берип келатабыз.

МААЛЫМАТ ИРЕТИНДЕ

  Араван райондук мамлекеттик архиви өткөн кылымда,  тактап айтканда, 1977-жылы 15-сентябрда негизделген.  Адегенде Араван райондук элге билим берүү бөлүмүндө жайгаштырылган. 2006-жылы Араван райондук калкты жайгаштыруу бөлүмүнүн имаратына убактылуу көчүрүлгөн. Андан соң 2009-жылы райакимчиликтин имаратына орун которгон.

Араван райондук мамлекеттик архиви учурда заманбап тейде жабдылган. Анда бардык шарттары бар бөлмөлөр дээрлик жетиштүү. Ушул күндө мекемеде 160 фонду, 22 816 сактоо бирдиги, мындайча айтканда, 1932-жана 2000-жылдардагы бүт документтер көздүн карегиндей сакталуу турат. 

Алишер ТОКСОНБАЕВ, өз кабарчы