6 Бардыгы /

Үстүбүздөгү жылдын июль айында Ош шаарында жүргөн селдин кесепетинен 1480 соодагер жапа чегишкен эле. Бул туурасында Ош шаар мэриясынын экономика, каржы жана инвестиция бөлүмүнүн башкы адиси Эрлан Атабаев билдирди.

Анын айтымында, ар бир ишкерге келтирилген зыяндын өлчөмү ар башкача: 100 миң сомдон 1,5 миллион сомго чейин. 30га жакын соодагерге 1 миллион сомдон ашык материалдык зыян келтирилген. Ошондуктан, бүгүнкү күнгө карата 522 ишкер мамлекеттен 100 миң сомдон алышты. Дагы 623 соодагердин тизмеси министрлер кабинетинин бекитүүсүнө жөнөтүлдү. Бөлүм акча бөлүү боюнча чечимди гана күтүп жатат.

– Соодагерлердин арасында Салык кызматында каттоого турбагандар, же селден кийин каттоого тургандар дагы бар. Аларга компенсация каралган эмес! — деп кошумчалады Ош шаар мэриясынын экономика, каржы жана инвестиция бөлүмүнүн башкы адиси Эрлан Атабаев.

Эскерте кетчү жагдай: быйыл 14-июлда катуу жааган жаандын кесепетинен Ош облусунун айылдарында жана Ош шаарында катуу сел жүргөн. Сел төрт адамдын өмүрүн дагы кыйып тынды. Мындан тышкары элди эвакуациялоо учурунда бир адам каза тапты. Президент Садыр Жапаров мамлекет селден жапа чеккендердин баарына жардам берээрин баса белгилеп, ошол эле учурда сел, зилзала, өрт, же башка кырсыктар учурунда мамлекеттик камсыздандыруу компаниясы кыйраган мүлктөрдү тез арада калыбына келтириши үчүн адамдар турак-жайын өздөрү милдеттүү түрдө камсыздандырууну үйрөнүшү керектигин дагы айткан. 

Алишер ТОКСОНБАЕВ, өз кабарчы