27 Бардыгы /

Ютубдагы «За правду» баракчасынын ээси А. К. аттуу жаранга карата Кылмыш-Жаза кодексинин 278-беренесинин (Массалык башаламандыктар) негизинде кылмыш иши козголуп, ыкчам тергөө амалдары башталды. Бул туурасында Ош облустук ички иштер башкармалыгынан маалымдашты.

        Маалыматка караганда, кылмыш иши анын ютубдагы баракчасына жарыяланган видеоматериалга жүргүзүлгөн соттук-лингвистикалык экспертизанын корутундусуна ылайык гана козголду. Анткени, ушул жылдын 5-июль күнү Ноокат районунун Кулатов айыл өкмөтүнүн тургундары чогулушуп, «ЮКЦ» цемент заводуна барышкан. Ал жерде чет элдик инвесторлордун иш алып баруусуна тоскоолдук жаратып, мурда иштеп кеткен К.А. аттуу жаранды кайрадан «ЮКЦ» цемент заводуна жумушка алууну талап кылышып, бейбаштык кылышкан. А. К. кылмышка шектүү сыңары ушул жылдын 22-октябрь күнү кармалып, убактылуу кармоочу жайга киргизилди. Ушул тапта ыкчам-тергөө амалдары улантылып жатат.

        Ош облустук ички иштер башкармалыгытараткан маалыматта айтылып жаткан А. К. аттуу жаран «За правду» деп аталган ютуб баракчасынын ээси – Азамат Карабаев экени соцтармактарда жазылды. Иликтөөчү журналист Болот Темиров ютубер жаңы курулган Ош-Ноокат жолунун бузула баштагандыгын интернетке чыгаргандан кийин 48 саатка камалганы тууралуу дагы жазылды. Ютуберди кармоо учуру тартылган видеону Фейсбуктагы баракчасына жайгаштырды

        Ал эми ноокаттык Ютубердин апасы милиция кызматкерлери Ош шаарындагы үйүн тинтүүгө алышкандыгын жана уулун «ЮКЦ цемент завод тууралуу видеоматериал боюнча кармап жатышкандыгын» ачыктады.

        Кыргызстанда 2023-жылы адепки соттук инстанцияларда Кылмыш-Жаза Кодексинин 278-беренеси («Массалык башаласандыкка чакыруу», 327-беренеси («Бийликти күч менен басып алууга үндөө») жана 330-беренеси («Кастыктын түрлөрүн козутууга чакырган») боюнча 19 кылмыш иши каралган. А түгүл 30 адам соттолгон. 2024-жылдын биринчи жарымында биринчи бутактагы сотторго жогорудагы беренелер менен 71 кылмыш иши түшкөн. Булардын арасынан 40 иш каралып бүтүп, 28 адам соттолду, 22 адам акталды. Булардын басымдуу бөлүгү журналисттер, блогерлер жана активисттер.

Алишер ТОКСОНБАЕВ, өз кабарчы