63 Бардыгы /

Ош облусунун Ноокат районунда балдар чоподон курулган мектептерде билим алып жатышат. Бул жөнүндө Жогорку Кеңештин жыйынында депутат Советбек Рустамбек уулу жар салды.

Советбек Рустамбек уулунун айтымында, Мирмахмудов айылында 1993-жылы ашар жолу менен чоподон курулган мектеп бар. Ал 180 орунга ылайыкташтырылган, бирок учурда 630 бала билим алып жатышат.

– Эч кандай шарты жок! Жаан жааганда имараттын температурасы сырттагыдай эле болот. Нымдуулук. Тиешелүү мамлекеттик органдарга кат жөнөтүлгөн. Сураныч, жардам бериңиз.? Ал эми Нойгут айылында 1975-жылы курулган бала бакча бар. Ал жакка 150 бала барат. Ал эми айылда 7 миң адам жашайт, — деп тызылдады Жогорку Кеңештин депутаты Советбек Рустамбек уулу.

Эл өкүлү Советбек Рустамбек уулу, ошондой эле Ноокат районундагы Гүлистан айыл өкмөтүндө эки гана типтүү мектеп бар экенин белгиледи. Бири 2 миң бала окуса, экинчиси 700. Экөө тең өткөн кылымда, тактап айтканда, 1993-жылдары чоподон ашар ыкмасы менен курулган. Ошондуктан, депутат аталган айылдарга мектеп жана бала бакча курууну 2025-жылдын республикалык бюджетине киргизүүнү суранды.

Алишер ТОКСОНБАЕВ, өз кабарчыбыз