3 Бардыгы /

Ош облусуна караштуу Ноокат районунун Көк-Жар айылдык милиция бөлүмүнүн пара алган бир катар кызматкерлери кармалышты. Бул туурасынжда Ички иштер министрлигинин басма сөз кызматынан билдиришти.

        Маалыматка караганда, ушул жылдын 20-ноябрында Ноокат РИИБсынын Көк-Жар айылдык милиция бөлүмүнүн башчысы милициянын майору А. уулу Т. кызматтык кабинетинде кол алдында иштегендерден акча алып жаткандыгы боюнча тартылган видео жарыяланган. Бул факты боюнча Ички иштер министрлигинин Ички иликтөө кызматы алдын ала текшерүү жүргүзгөн. Ошол эле күнү ИИМдин Тергөө кызматы тарабынан дагы  аталган факты боюнча Кыргыз Республикасынын Кылмыш-Жаза Кодексинин 342-беренесинде («Адамдардын тобу тарабынан пара алуу») каралган кылмыш курамынын белгилери боюнча кылмыш иши козголгон. Тергөөнүн жүрүшүндө ушул жылдын 21-22-ноябрь күндөрү Ош облусунун Ноокат РИИБсынын беш участкалык ыйгарым укуктуу өкүлдөрү М. у Ш., Н.З., М.А., М. у Б., Х. у Т. кармалышкан. Ошондой эле Ноокат РИИБсынын Көк-Жар айылдык милиция бөлүмүнүн нөөмөтчүсүнүн жардамчысы М.Н. кармалды. Кармалгандардын баарына тең пара алууга шериктеш болгон деген айып тагылган. Кармалгандар Бишкек ШИИББсынын убактылуу кармоочу жайына киргизилишти.  Соттун чечими менен кармалгандардын баарына тең бөгөт коюу чарасы камакка алуу түрү тандалды. Ушул тапта тергөө иштери кызуу улантылууда.

        Ички иштер министрлиги укук коргоо органынын коомчулуктун көз алдында кадыр-баркына шек келтирген жана орду толгус зыян келтирген паракорлордон, ошондой эле  мыйзамдуулукту дагы бузгандардан милициянын катарын тазалоого багытталган иштерди туруктуу негизде жүргүзүп келатат.

Алишер ТОКСОНБАЕВ, өз кабарчы