36 Бардыгы /

Кечээ, 20-январда Кыргыз Республикасынын Башкы прокуратурасынын имаратынын алдында М.Э.А. аттуу жаран сот жана прокуратура органдарына нараазычылыгын билдирип, жанына ала келген күйүүчү майды чачып, өзүн өрттөөгө аракет кылган.

Кыргыз Республикасынын Башкы прокуратурасынын маалымат кызматы билдиргендей, аталган жаранга медициналык жардам көрсөтүлүп, ооруканага жеткирилген. Бул окуя боюнча Октябрь РИИБи тарабынан тергөөгө чейинки текшерүү  иштери жүргүзүлүүдө. 

Аталган жарандын дооматтары тууралуу белгилей кетсек, Октябрь РИИБи тарабынан А.у.М. аттуу жаран алдоо жолу менен жабырлануучу М.Э.А.га таандык баасы 63 000 АКШ доллар турган автоунаасын сатып жиберип, акчасын кымырып алган фактысы боюнча кылмыш иши козголуп,  А.у.М. камакка алынып, кылмыш иш 2024-жылдын 4-декабрында соттун кароосуна жиберилген. Бирок, Октябрь райондук сотунун судьясы айыпкер А.у.М.-ди сотто катышкан прокурор тарабынан камакта калтырууну сурагандыгына карабастан аны камактан бошоткон.

Прокуратура тарабынан соттук кароодо айыпкерди кайрадан камакка алуу тууралуу өтүнүч келтирилет.

Мындан тышкары Бишкек ШИИББде А.Т. жана А.К. аттуу жарандар камакта турган Бишкек шаарынын Осипенко көчөсүндөгү үйдү М.Э.А.га жана И.А.га 500 000 АКШ долларына алдоо жолу менен саткан фактысы боюнча кылмыш иши тергелүүдө.

Жогоруда белгиленген жагдайлар Башкы прокуратуранын көзөмөлүндө.