15 Бардыгы /

Өзгөчө кырдаалдардын алдын алуу ишин күчөтүү тапшырмасы берилди

Бүгүн Жалал-Абад облусунун Жарандык коргонуусунун иш пландарынын 2024-жылда аткарылышы, 2025-жылга коюлган милдеттерди талкуулаган онлайн жыйын өткөрүлдү.

Ага Кыргыз Республикасынын Президентинин Жалал-Абад облусундагы ыйгарым укуктуу өкүлүнүн биринчи орун басары Нурлан Эрматов, ӨКМдин облустук башкармалыгынын башчысы Абдулнасир Закиров, тийиштүү кызматтардын жетекчилери, онлайн тартипте район, шаар башчылары катышты.

Жыйында 2024-жылы облус аймагында орун алган өзгөчө кырдаалдар, кесепеттерин жоюу жана алдын алуу чаралары тууралуу маалымат берилди.

Облус башчысынын биринчи орун басары Нурлан Эрматов, район, шаар жетекчилерине кооптуу аймактарда жашаган жарандарды көчүрүү аракетин жандантуу тапшырмасын берди. Ага катар сел жана суу ташкындарынын алдын алуу, арык-каналдарды тазалоо, кооптуулук жараткан мыйзамсыз курулуштарды буздуруу, жээк бекемдөө жумуштарын баштоону тапшырды.

Белгилей кетсек, 2024-жылы Жалал-Абад облусунда жалпы 36 ар түрдүү өзгөчө кырдаалдар катталган. Облуста жалпы 1035 үй-бүлө кооптуу аймактарда жашап, алардын ичинен 770 үй-бүлөгө мамлекет тарабынан жер тилкелери берилген.

Облуста өткөн жылдагы сел жана суу ташкындарынан коргоо кызматынын иш-мерчемине ылайык, 30 млн сомдук жумуш аткарылган. Ошондой эле жергиликтүү бийликтин күчү менен 565 миң 345 метр сел арык-каналдары тазаланган.

Жалал-Абад облусунда турак жайларды өрттөн жана табияттын ар кандай кырсыктарынан милдеттүү камсыздандыруу боюнча 2024-жылы жалпы 74 миң 37 объект камсыздандыруудан өткөрүлгөн. Бул көрсөткүч 2023-жылга салыштырмалуу 30 миң 196 келишимге көп.